Wakiri wa Rîgathî, Ndegwa Njirû, aroigire hau hau ciira wa kûhagûrwo gîtî-inî kwa Rîgathî watuuo, atî nîaregana na itua rîu rîa igooti.
Ndegwa Njirû nî ûmwe wa mawakiri arîa makoreetwo magîteithania ciira wa Rîgathî wa Gachagua na Wakiri Mûnene, Paul Mûite.
Oima mûraango-inî wa igooti ûguo, Ndegwa Njirû araakorire amemeerekia a moohoro meetereire kûigua mawooni ma mawakiri. Arameera na kinyi atî, ûrîa ciira wa Rîgathî watuuo nî igooti, nî njîra îtaanahe gatiba mweke.
Wakiri Ndegwa Njirû aroigire atî manjaanji macio maatua ciira ûcio nî ta gûthika meegûthikaga gatiba nguû. Ciira ûcio wa kûhooya igooti rîonanie atî Rîgathî wa Gachagua aarutirwo wîîra-inî wa Mûniini wa Mûtoongoria wa Bûrûri kîîmahîtia, ûraikirio nja Njuumatatû ya kiumia gîîkî.
Wakiri Paul Mûite, Ndegwa Njirû, na acio angî mararûûgamîrîire Rîgathî wa Gachagua, mareendaga igooti rîone mahîtia marîa meekirwo ûhoro-inî wa kûhagûra Rîgathî wa Gachagua gîturwa-inî. Na kwoguo aakorwo aarutirwo na mahîtia rî, ndagaagîkuuithio mîrigo îrîa îkuithagio mûndû mûhagûre gîturwa-inî; mûrigo ta gûtuîka ndaangîrûûgama gîtî o na kîrîkû gîa gûtoongoria mûingî.
Itua Rîa Igooti
Ciira wa Rîgathî wa Gachagua ûrathikîrîirio na ûratuuo nî gîikaro kîa manjaanji matatû. Manjaanji macio nîo Fridah Mûgambi, Eric Ogola, na Anthony Mrima.
Ndegwa Njirû, ûrîa mararutithanagia wîîra na Paul Mûite, aroigire na ûrûrû mûingî atî gûkorwo igooti-inî agîthikîrîria manjaanji macio magîthooma itua rîa igooti, kûraarî ta gûkorwo mathiko-inî ma gatiba ya Kenya.
Aroiga atî, maraikarire igooti-inî mathaa ikûmi meetereire kûigua itua rîa haki, no haandû ha ûguo, mareeroreire mathiko ma gatiba ya Kenya na demokrasia yaake. Akîonania gîtûmi kîa mûrûûgamo waake, Ndegwa Njirû areerethire atî, igooti rîroigire nî kûrî mahîtia marooneka thabaarî-inî îyo ya Rîgathî wa Gachagua akîrutwo wîîra. No manjaanji macio matiinacooka gwîka ûrîa mûûndû angîtaanya igooti rîîke mahîtia ta macio moonekeete.
Mahîtia marîa Wakiri ûcio wa Rîgathî araaragia ûhoro wamo, nî gûtwaarithio ciira na mbere ona Rîgathî, mwene ciira, arwaarîîte ciira ûgîthiaga na mbere.
Agakiuga atî, igooti kuuga Rîgathî wa Gachagua nîahîtîirio no itua rîa kûmûhagûra gîtî-inî rîarî rîega nî ûhoro ûtarariingana. Harî Wakiri Ndegwa Njirû, aakorwo Rîgathî nîaahîtîirio ciira waake ûgîtwarithio na mbere Senate-inî, ona itua rîa Senate mûthenya ûcio rîakîrî rîa mahîtia.
Mawooni ma wakiri wa Rîgathî wa Gachagua magagîkorwo matiganîîte na ma wakiri wa Senate, Tom Ojienda. Ojienda aroigire atî igooti nî rîatua ciira ûcio wa Rigathî weega mûno.
Rîgathî Gûcookeria Mawakiri Maake Ngaatho
Ciira warîîka, Rîgathî wa Gachagua nîaracokeirie tiimu yaake ya mawakiri ngaatho nyiingî mûno, matoongoretio nî Wakiri Mûnene, Mûgaathe Paul Mûite.
Nîaracookire aracookeria ngaatho ambunge na maseneta marîa makoreetwo mamûnyitîîte mbaru. O hau nîaracokeirie ngaatho atoongoria araata ake a mûng’ethanîro, aa Eugene Wamalwa na Kalonzo, o na acio angî.
Ndûmîrîri ya Rîgathî wa Gachagua thuutha mûtheri nî atî, ûhoro ti mûthiru: gîîkî nî kîambîrîria kîerû. Naake Ndegwa Njirû agakiuga o ûguo: matirîîkanîtie na ndeto îno.