Wakiri ûrîa ûrarûûgamîrîire mbuunge ya Senate ciira-inî wa kûbuutwo kwa Rîgathî Gachagua, Professor Tom Ojienda, oigîte atî igooti rîraatuire itua ûrîa kwagîrîire.
Kûrî ûndû watukanîire andû aingî Kenya mûthenya wa iyo, Njuumatatû, rîrîa ciira wa gûtuunya Rîgathî wa Gachagua gîturwa kîa mûniini wa President waatuirwo. Maiguire igooti rîathana atî Rîgathî wa Gachagua arîhwo ciriingi cia Kenya million mîroongo îtaano makîmenya nî kweeri igoti nîrîona Rîgathî nîaahîtîirio. Makîiyûrîria atî aatuunyirwo gîturwa kîu na mahîtia.
No itua rîa igooti rîkîrîîka, gwatuîkire atî njîra îrîa Rîgathî aatuunyirwo nayo gîtî ndîarî na mahîtia. Atî o acio maaciirire ahagûrwo gîtî-inî mekire kûriingana na waatho.
Andû aingî magakîrigwo: Akorwo nî mûhîtîrie ûndû eekûrîhwo mirioni 50 rî, ithî ti gûkiuga kûhagûrwo kûu gûtiarî na kîhooto?
Tom Ojienda akoiga Aaca
Wakiri Tom Ojienda areerire amemeerekia a moohoro atî, mbeeca icio igooti rîroigire Rîgathî wa Gachagua arîhwo nî cia kûrûgamîrîra kîhooto kîrîa aimirwo, hîîndî îrîa Senate yatwarithirie ciikaro cia ciira wa Rîgathî na mbere, o na arwarîîte arî ciira-inî.
Agakiuga atî, itua rîa mbuunge ya Senate kûruta Rîgathî wîîra rîaagîrîire nî gûkorwo rîrî rîa mûthia, atî na gûtirî andû angî kana ikuundi ingî ciarî na kîhooto gîa kûrîgarûra. Agakiuga atî harî maûndû ma “impeachment”, Senate nîyo îrî uuge wa mûico.
Atî IEBC Ndîarî na Itemi Harî Gûthuura Ûrîa Ûgûcooka Ithenya rîa Rîgathî
Wakiri Tom Ojienda acookire akiuga atî komiconi ya ithuurano, IEBC, hatirî haandû yookagîra Professor Kithure Kindiki agîgaatuîka Mûniini wa President. Agakînyiitanîra na manjaanji arîa atatû maratuire ciira ûyû, nîo Justices Fridah Mûgambi, Eric Ogola, na Anthony Mrima.
O na gûtuîka Professor Tom Ojienda nî areeretha itûmi ciake weega, mawakiri arîa maratetera Rîgathî mareganîîte na itua rîa igooti biû. Ûmwe waao ûgwîtwo Ndegwa Njirû oigîîte karoothûa mbiri. Matirîîkanîîtie na magooti no mûhaka macookie ciira ûyû riiko.