Sabina Chege, ūrīa watūire arī wa Kīama kīa Jubilee, oigīīte atī kaba ūguo Mūhecimiwa Rīgathī wa Gachagua aahagūrirwo gītī-inī kīa “Deputy President”.
Sabina Chege aroigire ūguo ndeereti-inī araarī nayo TV-inī ya K24. Arakiuga atī we nī aikirie kura ya gūtigithia Rīgathī Gachagua wīīra, ambuunge magīikia kura ciao.
Sabina aracookire aroongerera atī, korwo ciira wa kūhagūra Gachagua gītī-inī no ūcookio riiko, aangiuga o rīīngī ahagūrwo. Akiuga ūguo, aratītīrithirie atī rīu o na nīguo aangīikia kura īyo ya kūmūhagūra na mīaki mūno.
Mwaka-inī wa 2023, Sabina Chege nīaiguīkire mūno kameeme-inī nī kwenda kūhagūra Mūhecimiwa Jeremiah Kīoni gīturwa-inī, kīama-inī kīa Jubilee.
Sabina nīarakīūririo gītūmi kīa mūrūūgamo ūcio waake ūhoro-ini wa Gachagua mahonjiano-inī macio ma TV. Naake aracookia weega ateegūthita.
Sabina Chege Kuuga Ūhoro wa Karaū nīkīo Gītūmi
Gīthuurano gīa Karaū (Ol Kalou) kīrīa gīekirwo July nī kīrooneka kūheithia Mūhecimiwa Rīgathī Gachagua gītīīo kīa mwanya. Andū marī gatū būrūri-inī, nginya a ciama ingī na ndūūrīrī ingī, nīmoigīte atī arī na kīheeo kīa mwanya kīeyuumīririe.
Mawooni macio moumanīīte na kuona ūrīa mūciindani wa DCP ahootire aciindani acio angī na kûraihu. Sammy Kamau Ngotho wa DCP arī na kura 35,440, ūrīa wanyiitītwo guoko nī thirikaari, Samuel Mūchina Ng’ang’a wa UDA aarī na 5,450.
Gūthūūkia mūno, thirikaari nī yaatūmīīte andū aingī a UDA matwarīre andū a Karaū iheeo. Imwe ciarī cia maendereo ma īīria, na ingī ciarī cia andū o eene gwīkenia. Andū a Karaū o na nī maariūkīirio mūūgithi na makareeherwo tūtarū ndeemu-inī. No macio matiatūmire mathuure mūūndū wa thirikaari.
Rīu ūhootani ūcio wa mūūndū ūrīa Gachagua aanyitīīte mbaru, nīūtūmīīte atoongoria aingī makorwo magīcarania na Gachagua. Nao amwe mataratuīte itua megūthiī kū moima thirikaari-inī, nī mareehīkire gūtua itua kūingīra DCP.
Undū ūngī nī atī Mūhecimiwa Gachagua araakorwo maitho-inī ma andū hakuhī o mūthenya. O na atarī na mīcemanio ya mūingī, araakorwo na andū me gatū, na ikuundi mwanya mwanya imūceereire gwake mūciī. Na amemeerekia no maragīkorwo ikuhī, makīenda kūūngania maribooti makoniī maceera macio. Magakīmakinyīria andū būrūri-inī, kūhītūkīra TV na mītandao īngī.
Rīu Sabina akiugīīte atī ndakeneetio nī ūrīa aroona ūhoro wa Mūhecimiwa Gachagua thuutha wa gīthuurano gīa Karaü. Gūgakīoneka ta mawooni maake maaregana na ma andū aingī būrūri-inī, arīa maarītie ndeto njega cia Karaū thuutha wa gīthuurano.