DCP’s Sammy Ngotho gûciinda Gîthuurano Gîa Ol Karaû (Facebook Photo)
DCP nî yahoota Karaû na kura 35,440. Karaû maroiga: Î mbere î mbere. Kamau wa Ngotho nîwe mûmbuunge mwerû wa Ol Kalou.
Maûndû marîa maraathiî na mbere Kenya nî maingî, no nî kûrî marîa andû mategeire matû mûno. Wa mbere nî gîthuurano kîniini gîa Karaû.
Gîthuurano Gîa Ol Kalou
Gwa kahiinda, Kenya yoothe îkoreetwo yeerekeirie maitho na matû gîthuurano-ini gîa Karaû (Ol Kalou). Gûkoreetwo gûkîoneka mûrûîri mbuunge wa kîama kîa DCP akîonia arîa angî rûkûûngû. Agakîoneka amahûrîîte koona nyiingî ma, kûriingana na ithabu rîa kura ikîingîra.
Mauuge ma kuuma ngiraûndi makoreetwo magîkinya koona ciothe cia Kenya, ûhoro ûkoniî gîthuurano gîîkî.
Gîtî gîîkî kîa ûmbuunge gîatigirwo gîtarî mwene thuutha wa gîkuû kîa Mûhecimiwa David Njûgûna Kîaraho. Nayo kambîini îrîa îkoreetwo kuo îkoreetwo îhaana ta theenema.
Mbeeca iratuîka ciitîîtwo itahaana kûûndû kûu. Na atî mûno iroima mwena ûmwe :wa thirikaari. Nao andû a Karaû nî ta meetîkanîirie mbeeca itikaaregwo. Makoiga nî gîcuunjî kîa igooti rîao reke macookerio guoko.
Kûraakîoneka ta andû oothe kûu Karaû, areeherwo mbahaca na atûmwo, oothe nî onjoku. Gûgagîcooka andû makahaana ta maraaria rûthiomi rûmwe. Gîkuundi kîmwe gîkaina rwîmbo rwa thirikaari na gîkaamûkîra mbahaca nduungu. Gîgacooka thaa inyaanya gîgakahûrîra mûrûîri gîtî wa mûng’ethanîro o wa gatûû. Agakîona mbeeca cia kambîini.
No o na akorwo ûmûûthî theenîta Methû nîekwonwo rîa gîturi, we na gîkuundi gîake nî ahûûmie. Wa mbere matingîrateng’eranirie kîîmoondo na andû a thirikaari. Wa keerî, kûraatuîka nîmaraanjîîtie gûthararîrio ciikaro ciao nî andû me na buundûki.
O na thikû niini thiru, mûhecimiwa Kaniini Keega araheirwo haandû ha kwîhitha nî andû gîcagi-inî. We na ndereba waake marateng’eretio nî andû me na ngaari igîrî. Ngaari yaake îkageria kûhiingîrîrio akiuma mûcemanio wa DCP kûu Karaû.
Rîrîa oonire tûtuka haandû makîûrîra ho na makiuma gwîthara. Nîho baamîrî îmwe yaamakuire tha îkîmûhitha, harîa eyoire biindiû na agîikia mûtandao-inî Aakenya moone.
Kwoguo, rîrîa andû a Karaû na mûng’ethanîro moona mûûndû wa UDA ateetwo ta arî toro, no magakena. Niingî magacookeria Ngai ngaatho. Mûno mûno, moumîrîra ma gîthuurano gîîkî nî meegûtûma wanasiasa oothe mecookere, na marore “Wanjikû” na maitho maangî.
IEBC Nî Yoiga Kamau Ngotho nî Ahoota
Gwetetera ti kûinaina. Thuutha mûtheri rûciinî rûûrû rwa Gataano, IEBC nî yaanîrîra moumîrîra ma gîthuurano kîniini kîa Ol Kalou.
Sammy Kamau Ngotho wa DCP nîwe wahoota na aneengerwo thatîbîkîti nî IEBC. DCP nîkîo kîama kîrîa gîtoongoragio nî Mûhecimiwa Rîgathî wa Gachagua.
Sammy Kamau Ngotho atoongoria Karaû na kura 35,440.
Wa keerî nî Samuel Mûchina Ng’ang’a wa kîama kîa UDA, kîama gîa thirikaari. Arî na kura 5,450.
Mûûndû wa Jubilee naake aatuîka wa gatatû, no kura ciake no ciîrirwo na mîheehû. Weega nî atî andû a Karaû nî maamûmenya, na maamenya atî nîendaga gîtî. Nî ûhûthû rîu marutithanie wîîra na Kamau wa Ngotho.
Karaû nî yoonania atî:
- Wanjikû ti wa kwendia nyina nîûndû wa mbeeca
- Wanjikû ti wa gûthoomerwo gatiba nî wa gwîthoomera
- Wanjikû nîaririkanaga ûrîa ûraamwîrire ira, na akariingithania na ûrîa ûreeka rîu
- O na no arooraga ciîko ciaku cia ûmûûthî na mîario yaaku ya ûmûûthî, akoona kana nî îrariingana. Woiga tûrî a mûng’ethanîro ûmwe kwa mûhiano rî, wî tayaarî kwînyeerekia harîa niî ndîrooneka ndî na hinya nîguo tûhootane?
No kahiinda-inî gaaka, nî kahiinda ga gûcookeria andû a Karaû ngaatho, nî kuonania ûgima mûingî. Makaiga thaayû, na makarega kwamûkanio nî andû a kuuma na nja. Na makarega gûkîîgio nî mbeeca.
Makarega gûûkanîrîra o eene. Na arî korwo Aakenya kûûndû guothe no makobie kîonereria gîîkî.