Mûtumia wa mûthaaki ûmwe wa Venezuela nî araakuire hîîndî îno ya ithiingithia cia Venezuela. Mûthaaki ûcio wa mûbiira wa magûrû nîwe Hector Bello, ûûîkaine na rîîtwa rîîngî, “Kike”.
Ithiingithia iria irareehereirie mûtino ûyû ciarî cia hinya wa 7.2 na 7.5 gîthimi-inî kîrîa gîtagwo “Richter Scale”.
Hector aramenyithirie andû ûhoro wa gîkuû kîa mûtumia waake rîrîa araandîkire mûtaandao-inî wa Instagram. Akîonania ruuo rûingî ma, aroigire atî mwendwa waake arakuire akîgeria kûhonokia mwana waao.
Kûrî mûthenya wa Gataano, Hector Bello nîacokeirie araata ake ngaatho nîûndû wa kûmûnyiitîrîra ihiinda-inî rîîrî rîa kîeha. O hau nîameerire atî mwana waake na tata wa mwana marî thibitaarî.
Mûtumia wa Hector Bello nî wa kuuma mûciî wa gîcûa-inî wa Venezuela, wîîtagwo Cumana.
Mûtumia wa Mûthaaki ûngî na Ciana Ciao Gûkua
Mûthaaki ûngî ûrî na ruuo rwa kûûrîrwo nî bamîrî nî Lucas Trejo. Trejo nî wa kuuma Argentina no athakagîra kîrabu kîrî Caracas. Mûtumia waake na ciana igîrî nao marakuîrîire mûtino-inî o ûcio wa ithiingithia.
Athaaki Gûkua Gîthiingithia-inî
Mûtumia wa mûthaaki Hecto Bello “Kike” agîkua, no kûrî athaaki a mûbiira maraakuire o kûu Venezuela.
Ûmwe eetagwo Razan Sijaa, wa gîkuundi gîa athaaki matakinyîtie mîaka 18. Ûngî nî Victor Palacios wa San Agustín’s academy.
Eendi akaru a mûbiira wa magûrû nî maracakaya na athaaki aya marahuutirio nî mûtino ûyû wa ithiingithia cia Venezuela.
Andu Hakuhî Ngiri Igîrî Gukua Ithiingithia-inî
Ithiingithia icio irooragire athaaki a mûbiira wa magûrû, na angî baamîrî ciao, ciûragîîte andû hakuhî ngiri igîrî gûgîgaakinya ûmûûthî. Arîa mooîkaine gûkua kwao nî makinyîîte ngiri ya magana mûgwanja (1,700).
Gikuundi kîa Uûrumwe wa Mabûrûri (United Nations) nîkîo kîheanîte namba îno. Gîcookete gîkoiga atî ithiingithia icio cia mweri 24 wa June nî ciagithîîtie andû aingî ûikaro. Gîkoiga atî andû arîa mathûkîirio mîciî na njîra nene nî ta ngiri ikûmi na igîrî (12,000)
Uhoro ûyû nî wîîkîrîîte andû aingî kîeha, mûno mûno kûu Venezuela, na bûrûri marigainie wa Colombo. O na Colombo no kûrî andû maragurarire hîîndi ya ithiingithia icio.
Athaaki a mûbiira mwena wa Amerika ya Mûhuro nî magagaîtio nî ûhoro mûûru wa ithiingithia icio ciagûthire Caracas. Magagaîte mûno tondû rîîrî nî ihiinda maraatanyîîte gûkenerera maciindano ma mûbiira wa thî yoothe ûrîa ûrathiî na mbere Amerika.