Mayor Lori Blong akiaria uhoro wa murathani wa Midland (Photo courtesy of 9 KTSM)
Mûndû ûmwe araarathire andû na mûciinga kûûrîa Texas, Amerika, rûciinî rwa ira, no o naake rîu ndarî ho.
Gataano gaaka, 12/06/26, andû a îîria ya Midland, Texas, maraiguire tûrûtûrû ya mûciinga rucîîni maraarigwo nî kîî. Matiraambîîte kûmenya gîtûmi kîa mûndû kwanjia kûrathûkia mûciinga îîria yaao.
No macûûthîrîria, maroona atî mûrathani eerekeirie rithaathi ngaari-inî iria iraahîtûka bara.
Kumbe we eehithîîte nyûmba-inî îtakoragwo mûndû handû atangîoneka raithi! Nyûmba îo tene yahûthagûrwo ta kirinîki ya arwaru kûu Midland.
Araarathire andû Aigana?
Mûrathani ûyû nî aatigire aguraria mûûborithi Odessa ûtukû wa Gatatû (Wednesday). Kûratuîka Midland nakuo araarathire andû ikûmi ira, Gataano (Friday); ûmwe araakua, no kenda marateng’erio thibitaarî kûrigitwo.
Andû a Midland me na kîeha kîingî magîcakaya gîkuû kîa mûthuuri wîîtagwo Ed Scott wa mîaka 62, ûrîa ûrakuire aarathwo nî mwîki naaî ûcio.
Ed Scott nî mûndû ûrendeetwo nî andû a Midland, na ararutaga wîîra gwa kaanjû ya Midland.
Mûrathani Araarathire andû nîkî?
Kûracookire kûmenyeka atî thîîna wa mûrathani ûyû waambîrîirie o Gatatû ûtukû.
Borithi ciageririe kûmûrûûgamîria bara-inî Odessa, kûndû ta kiromita twendi kana thaate ûguo kuuma Midland. Haandû ha arûûgamie ngaari yaake marîîkanie weega na borithi rî, we akîûra.
Magîteng’erania ihenya rîa igûrû mûno na borithi bara. Rîrîa oonire ta borithi ikûmûnyiita rî, akiuma ngaari-inî akîanjia gûcitûrîkîria mûciinga.
Aarî na mûciinga mîtheemba îno mînene, wa “rifle”. Mûborithi ûrîa wang’ethanîire naake agagîtûrîkia mûciinga eegite rî, nîagûthirwo nî mbûrûgûtû kuuma kwî mwîki naaî ûyû, na akîgurara.
Mûrathani ûyû atî nî mûndû wa mîaka 45 wîtagwo Victor Mata Villarreal. Rîrîa bûrûri ûmîirwo nî mathîîna moimanîîte na mbaara ya Iran, naake mûhûgûi ûngî nî kwongerera aroongerera mathîîna maangî.
Aarathire Mûûborithi agîcooka agîthiî Kû?
Mûrathani ûyû nîamenyire nîeikia hairû rîrîa arathire mûûthigari. Agîgîcooka ngaari-inî yaake na ihenya akîmîhûûra mwaki. Ataanathiî hanene akîmîrûgamia akiuma. Akîanjia kûûra magûrû. Maûndû maya meekîkaga o Gatatû ûtukû.
Kûraatha mûndû nî ûûru, no kûratha mûûborithi nî kwîikia riiko.
Mûrathani wa Odessa Gûcario
Mûndû ûyû aanjirie gûcario o hau hau nî borithi kuuma mîena na mîena.
Akahîtwo nî borithi ya Odessa, ya Midland, na kûûndû kûûngî. Nginya Texas Rangers na “US marshalls” oothe maraarî ihîta-inî rîu.
Nîgetha mwîkî naaî ûyû akaanjia kûrathûkîria andû a Midland mûciinga rî, nîanjîîtie kwona ta arî hakuhî kûnyiitwo. Na hîndî îno mathaa 30 nî mahîtûku kuuma aaratha mûûthigari na aanjia gûcario.
Nî kûmenyekeete atî mûrathani ûyû nîambîîte kûhoria thimû yaake aamenya no mûhaka eethwo. Ûhoro wa gûthigaana harîa arî ûgîkîritûhîra borithi. No naake harîa aracookire gwakîria thimû, borithi ndîînarîa marîîgu: îramûthiingata.
Na nîho araakîmenyire ee hakuhî kûnyiitwo, araanjia kûrathûkîria ngaari bara rithaathi.
Borithi nacio ti kau. Irookîîte nginya na gîkuundi kîrîa kînaa gîa “SWAT squad”. Mûtumia ûmwe wa kûu Midland areerire CNN atî maabithaa acio nî ta marakinyîîte twendi (20).
Maraakimithirie ngaari yaao rûgiri îraahîtûka naruo, marakora kîmaramari kîu o harîa kîreehithîîte. No maragîkorire gî gîkuû. Mawooni ma hau hau maroonania ta arî kîo kîrehûûrire rithaathi gîtaanakinya gûikio bîîngû.
Andû a Midland Kûnyiitanîra Kîeha-inî
Ngabana wa Texas, nîwe Greg Abott, nî akûûmithîîtie gîîko kîu kîrathiire na mbere gwake, Texas, gîîko gîa kûguraria andû marî maûndû-inî maao.
Naake mîya wa Midland, Mayor Lori Blong, nî mwîkîre kîeha nî ndeto îno. Akîheana macakaya maake, nî aracokeirie ngatho iteengo mwanya mwanya cia borithi, nî wîîra mwega iraarutire wa kûhîta kîmaramari kîu kîramakoririe kîeha.
Aracooka arooria andû a Midland manyitîrîre bamîrî ya Ed Scott na mahooya. Scott araarî na mûtumia na ciana, na nî baamîrî îramwendeete mûno.