in
Aakorwo kûrî mûndû ûrahooya mbaara îno îthire rîu nî Trump. No thîîna nî ûrîa aangiuga o ro rîmwe atî nîatiga gûtharîkîra Iran, na aage gûtigwo na thoni. Kwoguo kiumia gîîkî, nî aanjîtie gûthaakîra andû hakiri.
Arathiire mûtandao-inî ira Njuumatatû rûciinî, araandîka na ndemwa nene atî Amerika na Iran nî maraciira ûrîa mekûniina mbaara îrîa îraathiî na mbere. Araakiuga atî nî aroona nduundu icio mabûrûri maya maracookania igîthiî weega. Areeretha atî, nî kûrî ndeereti cianjîîtie mûthenya wa Kiumia, na nî îgûthiî na mbere mûthenya wa Njuumatatû, nîguo mweri 23.
Andû a biacara kûigua atî mbaara îno îtaramenyeka bata waayo nî îîgûthira rî, maraanjia gûthirwo nî wagaagu. Na thoko cia makaambûni manene iroonania ûguo, toondû cieya kana “shares” nî iraanjirie kûhaica mbei. O na maguta marîa maraakinyîîtie ndoora igûrû rîa $110 o itaangi maragûûagûûa nginya thî ya $95.
Nî Ûhoro wa Ma Amerika na Iran nî Maraaranîria?
Trump naake ndamenyagîrwo. Ira mûthenya-inî amemeerekia a moohoro mamûûria ûhoro wa mîbaango ya gûkinyia mbaara ya Iran mûthia ta ûrîa ararokeete kwandîka mûtandao-inî, we nîarekîrire maandîko macio mûkoonde. Na nî arakiugîîte atî nî amba kûrûgamithia mbaara îyo kahiinda-inî ga thikû ithaano. No andû arîa aroigire maratwarithia ndeereti icio na mbere nî mwanake ûhikîîtie mwarî, nîwe Jared Kushner, na abithaa mûnene ûrîa ûrûgamîrîire maûndû ma Amerika gîcigo-inî kîa “Middle East”, wîtagwo Steve Witkoff.
Ndaanagweta nûû ûrûûgamîrîire Iran ndeereti-inî icio.No nayo Iran kûigua ûrîa Trump aroiga ûhoro wa ndeereti cia kûiguithania, îreerire andû a moohoro icio nî ng’ano cia marimû. Atî gûtirî ndeereti ta icio jeshi îrîa îraarûa ya Islamic Revolutionary Guard (IRG) yûûî ûhoro waacio. Kwamenyeka thoko-inî ûrîa Iran yoiga, thogora wa maguta ûraanjia kûhaica rîîngî.
Israeli ndîtithîtie Mbaara
Nî weega kûririkana atî mûico-inî wa kiumia kîrîa kîraathirire, Donald Trump aarîîtie na ûrûme mûingî akoiga atî aahe Iran mathaa mîroongo îna na manaana (48) kûhiingûra biû gacîra ka meeri ka maaî-inî ka Hormuz (Strait of Hormuz). Na atî Iran yaarega ûguo na gûkinye Njuumatatû ya ira, Amerika îkwanjia gûikia makomboora ma hinya igaanda-inî cia maguta cia Iran.
Mîario îyo ya Trump harî ûndû îraatiga mûûndû atukanîirwo, ateekûmenya kana kweri Amerika îrî na mwerekeo mûkiindîrîku wa mbaara îno ya Iran.Kamûira kau, Israeli no îratuthûra Iran. Ira kwanja îraikirie makomboora me na hinya mûno mwena wa irathîro wa mûciî mûnene, Tehran.
No nayo Iran nî îroonanirie ûhoti mwega wa kûhîta makomboora macio, na kûnyiihia waanangîki wa indo.
Mûthoomi ûmwe wa koorenji îmwe Doha wîtagwo Mohamad Elmasry, areerire aandîki a Al Jazeera atî mbaara îno nî gûcaca îraacaca ti kûhûahûûa. Aroiga atî rîu ûgwati Iran ûkinyîîte nginya ciikaro-inî cia raia, na mîciî îrîa yaanaangîîtwo nî makomboora ma Israeli nî mîkinyu ngiri ithaano (5,000).