Harîa ûhoro ûkinyîîte wa Kûûragwo Kwa Mûtuungatîri wa PCEA Naikuru

Ûrîa ûraarî mûtuungatîri wa PCEA wa kanitha wa Tabuga gîcigo kîa Lanet kûûrîa Bahati, Naikuru, nîarîkîîtie kûmenyeka ûrîa aakuire.

Reverend Julius Ngarî Ndumia wa PCEA Tabuga ooragirwo ûtukû wa kiumia, mweri ithatû mweri wa gataano (3^rd May). Aratuîka aakorirwo nî andû gatagatî ga thaa inya na ithaano cia ûtukû.

Arîa maamûûragire maingîrire nyûûmba kûrîa araikaraga îîria ya kanitha o ûcio wa Tabuga. Mbere îyo, andû acio maakoreete mûraangîri wa kîhiingo, makamûhûûra, na magacooka makamuoha.

Uuge wa Ndagîtaarî, Naikuru

Mwîrî wa Mûtuungatîri Ndumia ûrî moocarî ya Naikuru, thibitaarî-inî nene ya thirikaari.

Mûthenya wa ira, ndagîtaarî ûrîa ûroraga mîîrî gûtuîria kîrîa kîraarutire mûûndû muoyo (pathologist), aroigire thuutha wa “Post Mortem” atî Mûtuungatîri Ndumia aakuire nî maûndû meerî:

 

1. 1. Kûgûthwo na hinya na kîîndû gîturumbaru mûtwe na hau igoti, gûgatûma:

              a) oire thakame mûno makîria

             (b) toombo kûhihinywo ûûru

2. 2. Kûhihinywo mûmero akaremwo nî kûhiihia.

Ndagîtaarî nî aroigire atî Mûtuungatîri nî araarî na manjeraha maangî no matiraingîrîîte thîinî. Macio maroimanîîte na kwohwo mooko na magûrû kûgiria eegite agîtharîkîrwo.

Ndûmîrîri cia Macakaya

Baamîrî ya Mûtuungatîri Ndumia, na mûno mûno mûtumia waake Esther Wangûi, na ciana ciao, nî matûmîirwo ndûmîrîri nyiingî cia macakaya.

Mondorîta wa PCEA Kenya yoothe, Rt. Rev. Thegû Mûtahi, nî aatûmire ndûmîrîri ciake na cia kanitha wa PCEA mûthenya wa Njuumatatû.

Nîacookire akiuga atî ûhoro ûcio nî wa kîeha ma, na nîûgûthuthuurio weega. Nîogire atî nî aakoreetwo aaria na mûrûgamîrîri wa gîcigo kîa mbuunge kîa Bahati, Madam Irene Njoki, ûrîa waamwîrire nî ararûmîrîra ûthuthuuria ûcio. Mûmbunge ûcio nîamwîrire atî o na nîarîîtie na mûnene wa borithi (Inspector General) tayaarî.

Baamîrî no îraathiî na mbere kwamûkîra ndûmîrîri cia macakaya. Atoongoria a mbere gûtûma ndûmîrîri ciao maarî Kîmani Ngûnjiri, ûrîa waarî mûmbuunge hau kabere. Ûngî aarî mûmbuunge wa rîu, Irene Njoki.

Andû Makararanie na Mîario Nginya Maiguithanie

Gûtiri kûraamenyeka andû arîa marooragire mûtuungatîri Ndumia. Ona hakîri ûguo, arûmîrîri aingî a kanitha wa PCEA no meende kuona ûndû atoongoria maraaranîria o eene, na makaaranîria na arûmîrîri, mûno maûndû-inî me na ngarari.

Kîambîrîria-inî kîa mwaka ûyû, Njanûeri, kanitha ûngî wa PCEA o kûu Bahati, wahiingîrîirie mûtuungatîri waao na tiimu yaake ya athuuri a kanitha nja.

Kîrîîndî kîu gîa kanitha ûcio wîîtagwo PCEA Nyonjoro, gîkiuga atî atoongoria acio maathuurîte andû arîa meekûrûgamîrîra mwako wa ngoroba wî kûu kanitha-inî, makarega gwîtîkîra arîa maathurîîtwo nî kîrîîndî.

Thogothogo îyo yaanenehire nginya thigari igîûka gûcookia thaayû.

Arûmîrîri a PCEA mareehoka kanitha waao ndûûgûtuîka kûûndû gwa kûrerera muku. Haandû ha ûguo, ûtuîke kûûndû gwa kûrerera ndûgû ciî na Ûûngai.

O na Baba Mûtheru wa kanitha wa Gatooreki, îyo nîyo ndûmîrîri îrîa araceerire nayo rîrîa eerîga gûûkû Afrika mweri mûthiru.