Kûrî mweri wa keerî, nîguo February, nîgwatuîkire Baba Mûtheru nîegûka Afrika mweri-inî wa kana aceere.
Ûguo nîkûrahiingire, tondû nî areekinyirie bûrûri-inî wa Algeria ira.
Rîu ûmûthî, atiinda iceera kûu, aambîrîirie na mûciî mûnene wa Algiers.
Nîacemanîtie na maabithaa anene thirikaari-inî, agaceera mûthigiti-inî ûmwe kûu Algeria, agacemania na mathîa ma Gatoreeki na akaruta mitha, na agacooka akaaranîria na kîrîîndî gîtukanu andû a mîtheemba yoothe.
Nîarekîra Hinya Mûno Wîtîkio wa Mûthuure Agostino.
Baba Mûtheru aratuîka nîaraaragia mûno ûhoro wa Mûthuure Agostino arî ndege-inî agîthiî Algiers.
Ona ûmûûthî nîaceerire itûûra rîrîa Mûthuure Agostino aatûire arî mbicobu, rîîtagwo Hippo. No matukû tûrî itûûra rîu rîîtagwo Annaba.
Ûhoro wa Agostino gwîkîrîra hinya weendo haandû ha haaro, nîûragucîrîria Baba Mûtheru mûno kahiinda-inî gaaka. Agakîona atî, thayû ûrîa mabûrûri maraacaria ndwoneka na njîra ya mbaara. No wonekire na njîra ya kwendana na kwaranîria gûtarî na haaro.
Akoima Algeria rî?
Baba Mûtheru akaaruta mitha rûciû, acooke oimagare athiî bûrûri-inî wa Cameroon.
Kûu aceerere mûtoongoria wa bûrûri, mûthuuri wa mîaka mîroongo keenda na îtatû (93), President Paul Biya.
Na nîûndû wa gwîkîra hinya bata wa thaayû, magaacemania mûciî-inî ûgwîtwo Bamenda. Mwena ûyû wa bûrûri ûkoreetwo na thogothogo, nginya gûgatuthûka mbaara na andû magakua.
Gûtuîkaga gîcigo gîîkî kîendaga gîîtîkîrio kwîikaria, na kîyaathe kîrî kabûrûri kaniini.
Baba Mûtheru nîabangîîte gûcemania na ikuundi mwanya mwanya kûu Cameroon, kîmwe kîrî kîa arutwo arîa agaakora yunibaathîtî-inî ya Gatoreeki (Catholic University of Central Africa).
Ooima Cameroon, eegûkorwo atigîtie gûthiî mabûrûri maangî meeri: Angola na Equatorial Guinea.