Ûhoro ûrîa wî kuo wa mîgomo nîûranyiitire cukuru ya Lenana o nayo. Arutwo maarutire thogothogo ûtukû, nayo cukuru îkîîra aciari marookere ciana ciao.
Cukuru ya thekondarî ya Lenana nîyahiingirwo mûthenya wa Keerî kiumia gîîkî. Kûratuîka atî arutwo maatiindire o weega Njuumatatû ya mweri imwe (1/6/26), no gwakinya hwaî-inî maûndû makîgarûrûka.
Arutwo Gûthûkaangia Indo
O na akorwo cukuru îyo ya Lenana ndîheanîte ûhoro mûingî wîgiî thogothogo îyo ya arutwo, ndeto no nyumu. Kûraatuîka atî arutwo maanjîrîirie buunjo hîndî ya hwaî-inî rîrîa makoragwo îraathi-inî magîîthomera (prep time).
Atî amwe makîanjia kûhûûra matirica mwanya mwanya na kûmooraga iciicio. Atî maathûkaangirie indo nginya kanitha-inî yaao îîtagwo St. Luke. Na ti ta arutwo oothe meetîkanîirie wanaangi ûcio kûriingana na atî no kûrî maaguraririo.
Mûnene wa Thukuru Kûgurario
Kûrî mûthenya wa Keerî, ûtoongoria wa thukuru nîwageririe kweretha gîtûmi kîa mûgomo. Na ûkiuga ûrîa arutwo mataakenetio nî mûtabaarîre wa cerehe yaarî kuo mweri 31/05/26.
No o na hakîrî o ûguo, mûrutwo ûmwe nî aratuîka nî areerire nyina kaûndû kaangî. Atî arutwo o na nî maaguraririe mwarimû waao mûnene. Atî o na nî mamûikagîria mahiga.
Mwarimû mûnene wa Lenana kahiinda-inî gaaka eetagwo William Kiplagat Kemei. Kûratuîka atî ahonokirio nî gûtharwo na kuumio nja ya thukuru. Nî ûhûthû akorwo nî borithi ciamuumirie toondû, mûrutwo ûcio akiuga, nî ciakorirwo cietwo kwoneka thogothogo ti ya itherû.
Gîtûmi Kîa Mûgomo
Ribooti îroiga atî arutwo acio a Lenana nîmaarî na maraakara maingî nî ûhoro wa wikeendi îyo îraathirire. Nî kwabangîtwo cerehe makoragwo nayo o mwaka, îtagwo Maroon Festivals.
Gûgagîtuîka atî, o na arutwo maarîha o mûndû magana mataano, cerehe ndîakinyire kîwaango gîa kawainda. Magakiuga atî, mûini ûmwe wî gatû wataanyîîtwo gwîkinyia ndaigana gûûka.
Na njîra nguhî, arutwo acio nîmaiguire maheenekeete.
Ûtoongoria Kwîra Aciari Magîîre Ciana Ciao
O na gûtuîka arutwo a Lenana nî andû anene na meinûkagia mahiinda maangî, ûtoongoria nîwaarutire waatho ûngî hîîndî îno. Rîrîa buunjo yoonekire nîyaneneha, ameemba a mbûûndi macookanirie nduundu na ihenya, na magîtua itua cukuru îhiingwo.
Thukuru îgîgîtûmîra aciari ndûmîrîri ya hi na hi, atî magîîre ciana ciao gûgîkinya thaa igîrî cia rûciinî mûthenya wa Keerî. Waatho waarî atî mûrutwo agetîkîrio kuuma kîhiingo gîa thukuru agîîrîîtwo nî mûciari, kana mûûndû ûrî rekoondi-inî cia cukuru. Ûguo nî ta kuuga mûûndû aciari maandîkithîtie atî no amarûûgamîrîre.
Andû Kenya yoothe nîmaraakenire kûigua atî hatiinakinya haandû ha cukuru gûcinwo. No nîmaraiguire ûûru kûigua atî nîkûrî andû maragurarire.
Kîûndû gîîkî gîûkîîte gîa gûcina mathukuru gûûkû Kenya nî kîraagagia andû hakiri. Mûno mûno aciari arîa me na ciana mathukuru ma kûraarwo, nîmo “boarding”, nîmaraikara na wagaagu mûingî ma.
Ûhoro Mûniini wa Lenana
Thukuru wa Lenana ûrî ta kiroomita îmwe ûguo na thîinî kuuma barabara-inî ya Ngong Road, mûûndû eerekeire taûni ya Karen. Nî ûmwe wa mathukuru marîa matûûrîîte marî ma naacono (National Schools).
Tene Kenya îtaanagîa wîyaathi, thukuru ya Lenana yaarî ya athûûngû. Yaanjîrîirio mwaka-inî wa 1949 nî ngaavana mûkooroni weetagwo Sir Philip Mitchell, na hîîndi îyo yeetagwo “The Duke of York School”.