Mwaki ûngî ûraanjirie ûtukû wa ira thukuru-inî îrî Mûrang’a, o rîrîa andû mararakîtio nî kîeha kîa mwaki wa thukuru ya Naikuru.
Thaa ithaano ûguo îhîtûkîtie ndagîka ciigana ûna, nîguo ndeto iraanjirie gûtaamba ng’enda-inî kana mûtandao-inî, atî gwî thukuru îngî îraahîa. Kûrakîîrîkana atî thukuru îyo nî ya airîtu o nayo, na îîtagwo Gacarage Girls. Îrî kûûndû gwîtagwo Ruchu, Kaûntî-inî ya Mûrang’a.
Kûriingana na ûrîa andû marakoreetwo marokeire ndeto nditû cia mwaki wa thukuru ya Utumishi Girls Academy, nî marahahûkire mûno. Mûndû ûraiguire ndeto icio ataanakoma nîarathînirio nîcio gwa kahiinda.
Ngabana wa Mûrang’a Kwaria.
Kwa mûnyaka, nginya îtakinyîîte thaa ithaano na nuthu o hwaî, Ngavana wa Mûrang’a, Irûngû Kang’ata, nîararutîîte ndûmîrîri ya gûthereria andû ûrîa gûikaire.
Arameera atî wabici yaake nî îmenyeete ûhoro wa mwaki ûcio wa thukuru ya Gacarage. Arakiuga atî ikuundi cia maûndû ta maya ma manjeneti (emergency) irî thukuru-inî igîteithîrîria ta ûrîa kwagîrîire.
Ûhoro ûngî araheanire wa kûhooreria andû ngoro nî atî, arutwo oothe arîa maraarî kûu thukuru maraarî eega; atî matiinagurara.
Governor Kang’ata nî arahoire atî andû magerie kwaga gwîkûîra kîambîrîria kîa mwaki ûcio wa thukuru. Atî mareke maabithaa a thirikaari meeke ûthuthuuria ta ûrîa kwagîrîire.
Nîûndû wa ûndû ûngîkorwo ûgîthîînia mûûndû ûhoro ûkoniî mwaki ûcio, ngabana aroigire mûûndû ndagaakire naguo. Aroiga mûûndû no atûme ndûmîrîri kûhîtûkîra mûtaandao wa mwanya wa kaûntî ya Mûrang’a, nîguo “Mymuranga” app.
Nî ûndû wa kîeha kuona ûrîa kûhanîîte ta arî kîmera kîa mîaki mathukuru-inî. Mîaki ta îno to kîeha na haathara îreehage. Nî îthûûkagîria ciana mûtûûrîre.
Maûndû ma gîtheemba gîîkî maangîthiî na mbere, ma mîaki thukuru îtaraamenyeka karûgano kaayo, na maûndû maangî mooru ta maya mathukuru-inî, nîguo woonaga gîthoomo gîgîthûûka.
Na no ûthiî ûguo woone bûrûri ûkîgîa na andû aingî aniini matarî na gîthoomo. Na amwe a acio meingîrie maûndû-inî mooru. Nî weega o na rîrîa kwagîa mûnene wa bûrûri ûngî ûroiga ageni mainûke, gûkorwo atî Kenya nî îraamenya andû ake matirainûkio nî ûkora.