Mathiko ma Mûtuungatîri Reverend Ndumia nî ma rûûciû Njuumatatû, mweri ikûmi na îmwe.
Reverend Julius Ngarî Ndumia wa PCEA aakuire kiumia kîmwe gîthiru thuutha wa gûtharîkîrwo gwake mûciî.
Ûthuthuuria wa Ngero Îyo
Gûtirî kûramenyeka andû arîa mooragire mûtuungatîri ûcio ûratuungataga kanitha wa PCEA Tabuga, gîcigo-inî kîa ûmbuunge kîa Bahati, Naikuru.
No nî kûrîîkîtie kuuma ribooti atî nî kûrî andû eerî anyiite na kûhiingîrwo Naikuru, nîûndû wa kwoneka marî na indo imwe ciaiyirwo nyûmba-inî ya mûtuungatîri hîndî îyo aageragwo ngero. Gîteengo gîa thirikaari kîa DCI nîkîo kîroigire uguo ira, Njuuma.
Kûraatuîka ooragîirwo nyûûmba ya mûtuungatîri îîria ya kanitha, ûtukû wa Kiumia, 3/5/26, gatagatî ga thaa inya na ithaano cia ûtukû.
O na kûrî o ûguo, ûrîa waarî mûniini wa President Ruto hau kabere, Rîgathî wa Gachagua, oigire ûmûûthî atî nî ûhoro wî hinya gwîciiria, kuona atî gûtirî mûrûûgamîrîri o na ûmwe wa gîkîro kîa igûrû thirikaari-inî ûkûûmithîtie kûûragwo kwa Reverend Ngarî Ndumia. Oigire ûguo agîcakaya na baamîrî na arûmîrîri a PCEA, kanitha-inî Rongai.
Mûthenya wa Njuumatatû, Moondorîta wa PCEA Rt. Rev. Thegû Mûtahi ooigire atî mûnene wa borithi (Inspector General) nîamenyithîîtio ûhoro wa ngero îyo nî mûmbuunge wa Bahati, Madam Irene Njoki.
Thikû ta ithatû thiru, mûmbuunge ûcio nîerire andû atî ûthuthuuria nî mwambîrîrie na nî ûraathiî na mbere.
Macakaya na Mathiko
Nîgûkoreetwo na mahooya ma macakaya nîûndû wa gîkuû kîu kiumia-inî gîîkî.
Marîa manene maanjirie na ma Naikuru mûthenya wa Gataano mweri inyaanya. Maarî kanitha-inî wa PCEA Neema Church.
Macookererwo nî maangî ûmûûthî, 10/05/26, Rongai kûrîa baamîrî ya mûtigairî îikaraga. Namo moima kanitha-inî wa PCEA Macedonia.
Rûûciû naguo, 11/05/26, nîguo mathiko mabaangîirwo. Magakorwo gîcagi kwaa mûtungatî Ndumia. Na nîkuo Mathakwa-inî, Thîgîngî, Nyîrî.
Igongoona rîkaambîrîria kanitha-inî wa PCEA Mathakwa-inî, Thîgîngî, kaûntî ya Nyîrî, thaa inya cia rûciinî (10 a.m.). Mwîrî ûcooke ûthikwo mûgûûnda-inî waake, o kûu Mathakwa-inî.
Ngai aroiga Muoyo wa Mûtuungatîri Julius Ngarî Ndumia haandû heega matu-inî (May his soul Rest In Peace🙏).