Thirikaari ya Saudi Arabia nî îraareganire na Amerika wikeendi îno îraahîtûkire. Amerika îrabaangîîte kwongerera mbirarû hakuhî na Iran, nîguo atî îhiingûrîre meeri kîa hinya gacîra-inî ka maaî ka Hormuz.
Trump aheete mûbaango ûcio rîtwa “Project Freedom”. Kûrooneka ta Saudi Arabia înogeetio nî haathara îrîa îkoreetio nî Amerika mbaara-inî îno. O ûrîa UAE o nayo îrooneka ta înogeete.
Na toondû Saudi Arabia nîguo bûrûri ûrîa mûnene mûno harî arata a Amerika a gîcigo kîa Gulf, yaarîîtie no gûkooneka ta mawooni maayo marûgamîrîire ma tûbabûrûri tûu tûniinaniini: ta Bahrain na Kuwait.
Amerika îrookîra ha Ûhoro wa Hormuz?
Iran îkoreetwo îkîgiria meeri cia Amerika kûhîtûkîria maguta hau Hormuz. Nayo Amerika îkahiingîrîria meeri cia mabûrûri maangî iria cietîkîrio nî Iran kûhîtûka. Amerika îkoreetwo îgîeterera meeri ciume îîria ya Iran, îgaciihiingîrîria o rîîrî ciî iria-inî inene, îgaciihûûndûra.
President Donald Trump eehîtire atî akorwo meeri ciake itigwîtîkîrio kûhûthîra gacîra ga kawainda ka Hormuz, o na cia mabûrûri maangî itiikûinûkia maguta.
Îyo îkoreetwo îrî njîra ya kûhinyîrîria mabûrûri ma rûraaya, getha mamûteithie mbaara-inî ya Iran. No namo nîmaregeete.
Wa mbere, Donald Trump aanyiitanire na Prime Minister Benjamin Netanyahu wa Israel, makîanjia gûtharîkîra Iran mweri 28/02/26.
Trump ndaigana kûhuutîria atoongoria a mabûrûri macio mûbaango waake, o na makoreetwo me ndûgû na Amerika. O na ndaigana kwîra mbuunge ya Amerika (Congress) ûhoro ûcio mbere, ta ûrîa waatho uugîîte.
Kiumia gîtathirîîte kîmwe, Trump nîoneete Iran ti hûthû ûrîa eeciirîîtie. Agîkîhooya ûteithio kuuma kûrî Ngeretha na mabûrûri maangî ma rûraaya. Kamûira meeciirîtie nî atîa weega rî, Trump nîanjîîtie kûmaarîria ng’ara. Agakîmeera tiga ûguo maraciinjia; o na ûteithio waao no ûikare.
Project Freedom rîu îikaire Atîa?
Kûraatuîka Trump nîaraambire kûrûûgamia Project Freedom maaria na mûtoongoria wa Saudi Arabia, Crown Prince Mohammed Bin Salman.
Prince ûcio eerire Trump atî, aakorwo nîegûthiî na mbere na mûbaango ûcio wa kwongerera haaro, ndege ciake itikaagere rîera-inî rîa Saudi Arabia. Ûguo nîguo andû a moohoro a New York Times mararibootire.
Gûgagîtuîka mûkaana ûcio nî ûraaritûhîire Trump, araakîamba kûrûûgamia mûbaango ûcio.
Kwoguo o na thogothogo îrîa îraribootirwo Amerika îgûthîîte gîcigîrîra kîa Iran gîîtagwo Qeshm, nî mbirarû iria ikoreetwo îîria îyo ireekire ûguo. Ti cia Project Freedom.
Mbaara îno yaahota gûthiî ûguo îkinye mûthia andû mateekwîrwo na ûtheri. Nî toondû Trump nîarathiî arekeetio nî araata aake hakuhî othe. Mabûrûri ma rûraaya nîmaaikarire mwena, na rîu kûrooneka ta ma Gulf meegûthuna magûrû.
O na niingî nî ta mbaara yo yaamûimbîire tene akîaga wa gwîka. Toondû no eende ûndû aangîcookeria andû aake mooria: kîrîa gîagûtwarire mbaara nîûroonire?
Kîûria nî atîrî: Iran toondû îroigire no mûhaka îrîhwo haathara ya mbaara îno rî, îîkwoya mwerekera ûrîkû?