Mûndû ûgwîtwo Donald Trump, mûtongoria wa Amerika, rîu areenda mûruti mathekania ûmwe wîtagwo Jimmy Kimmel abuutwo wîîra.
O na athiîte na mbere kwîra kambûni nene ya ABC, îrîa nyene tûûngî tûniinaniini, îkaanjîre tûkambûni tûu tûûngî marûa. Na ti kuuga tûkambûni tûu nî tûniini mûno; aaca.
Ta rîu gîbiindi kîa mathekania gîa Kimmel nîkîîroragîrwo nî andû mirioni hakuhî igîrî (2 million) o mûthenya.
Na mweri-inî wa keenda mwaka mûhîtûku, hîndî niingî Kimmel aingîrîirwo nî Trump, gîbiindi gîake nî kîeroreirwo nî andû mirioni ithaathatû (6 million) ûtukû ûmwe. Na hîndî îyo, no kwarî thitîcîni ciahingîirwo gîbiindi kîu kîa hinya: mûno kûrîa mangaabana ma kuo manyiitaga Trump mbaru mûno.
Nîkîî Kimmel ekîîte Rîu?
Jimmy Kimmel eerîga kwonia eeroreri aake kabica ka mûtumia wa Trump aikaire thî gatagatî ka andû angî. Akiuga atî Melania arooneka e mûthaka ma, ta mûtumia wa ndigwa e na nda.
Eeroreri a gîbiindi magîkîng’aûrîra na mîtheko. Rîrîa kûratuîkire Trump nîaraakara na anenehia ndeto îyo, Kimmel aroire kamweke ga gîbiindi gîake kîrîa kîraarûmîrîire aroiga atîrî:
Niî ndioigire ûhoro wa mûtumia wa ndigwa nîgetha Trump akue kana ooragwo. Ndoigire ûguo gwîkîra mûkoonde ûrîa Trump na Melania matiganîte mîaka, tondû Trump nîagûthîîte mîaka mîroongo înaana (80), na Melania nî mûniini kûûngîra. (Kimmel o na ndakinyîtie mîaka 60, tondû aciaarirwo 1967).
O na akorwo Kimmel nî eeroreri aake areeraga ûhoro ûcio, nîûhûthû nîareendaga andû angî makinyîrio, arîa maiguîte mateta ma Trump. Na ningî no ho mûrûûgamîrîri wa gîbiindi gîake, nîwe ABC, ekûiguîra gwîtetera gwake.
Anene Matûûrîîte Meekîrîtwo Mathekania-inî
President na atoongoria angî a Amerika matûûrîîte meekîrîtwo mathekania-inî, na matione ûndû mûnene. Andû ta President George W. Bush na mûthuuri ûgwîtwo Bernie Sanders, maanatûma andû magwe na mîtheko rîrîa mîarîrie yaao yaikio ibiindi-inî cia mathekania.
O na mabûrûri-inî maangî ta Kenya no guo. Ta rîu President Moi me na President Kîbakî maanaikio ibiindi-inî cia mathekania na matimake. Rîmwe magatheka andû angî magîtheka, na rîîngî hiihi makoiga mareke andû mathûûkûme.
Athoomi a maûndû ma mîtugo na meeciiria moigaga atî, mûtoongoria ûtaangîkirîrîria akîgwetwo kana akîrutwo mahîtia na njîra ya mathekania nî mûndû ûteîtîkîîtie. Na ti mûndû mwega arî gîtî-inî gîa ûtoongoria.
Magakiuga atî, atoongoria arîa meîtîkîtie, nî gûkena makenaga nî kûmenya ûrîa andû a kawainda mameeciiragia. Toondû no maiguîrîire mathekania-inî hatirî kamweke kaangî. Magakîgîa na kamweke ga gûthoondeka harîa haangîhoteka.
Na o na maûndû maangî matiikagio mîtheko-inî getha kûgîe na ûndû ûûgûceenjio. No andû maheagwo kamweke ga kûhûthahûthia meeciiria. Ta rîrîa mûtûûrîre waaritûha nîûndû wa indo kûgîa goro, eeroreri na athikîrîria makagîa na kamweke ga kûnogora meeciiria. Na makanyiihîrwo nî mîrimû ya ngoro na meeciiria.
Na niingî to mûhaka mûtoongoria atiinde akîaria ûhoro wa maûndû moothe marî kameme-ini kana TV-inî; ona kana mûtandao-inî. Mûtoongoria no akire ta ûrîa mûniini wa President, J.D. Vance, araakira ûhoro ûkoniî mbaara ya Iran.