Typhoon Dolphin Kwarahia Shanghai

Typhoon Dolphin nî kîrûhuuho kîrî ho gîatanyîîtwo kûgûtha Chîna ya itherero Gataano karîa karahîtûkire. No kîracookire gûkinya îîria ya Shanghai mûthenya wa Kiumia, mweri keenda (August 9^th 2026).

Na gûûka gwa kîrûhuuho kîu kûraarî gwa thibiindi ya kiroomita igana rîa mîroongo îtaano (150 km. / hr). Typhoon Dolphin îgîûkîîte na thibiindi ta îyo rî, na îkuuîte maaî maingî tondû yuumîîte iria-inî rî, haathara ndîngîaga.

Îraambire îraamomora manyûûmba kûûrîa Japan, makinyîîte hakuhî ngiri mîroongo îtaano (50,000). Kwanja gîcigîrîra kîa Okinawa kûu Japan nîkîo kîraiguire igûtha inene biû.

Typhoon Dolphin yagûthire Okinawa Gataano, mweri mûgwanja (August 7, 2026), na haathara îgîkorwo îrî nene mûno. Haathara yanenehire toondû nakîo kîrûhuuho nî gîakîrîtie thibiindi ya igana rîa mîroongo îtaandatû (over 160 km / hr).

Ûhoro wa ma-Typhoon

Typhoon nî marûhuuho moimaga maria-inî manene, ta Pacific kana Atlantic. Moonekaga rîrîa iria rîagîa na ûrugarî mûingî, ûûgûkinya ta ndiingirii twendi-ceebeni (27° C).

Ûigû (vapour) ûgakîingîha rîera-inî. Kûngîgîkorwo nî kîmera kîa huuho nene iria cierekagîra mwena wa rûgûrû rwa rûgoongo wa Pacific Ocean, typhoon nî yoombwo. No kîrûhuuho ta kîu no nginya gîkorwo na thibiindi nene biû getha gîîtwo “typhoon”. No mûhaka gîthiî na thibiindi îkinyîîte kiroomita igana (minimum 100 km/hr).

Nîûndû wa mwena ûrîa kîrûhuuho gîkunûkaga, haathara ya mataibuuni îhuutagia mabûrûri ta Japan, Philippines, Taiwan, China, na îîria îyo îthiûrûrûkîirie.

Typhoon Dolphin Gûthogothania Shanghai

Shanghai nîguo mûciî ûrîa ûrî andû aingî biû bûrûri-inî wa China. Na nî mûciî ûrî biacara na igaanda nyiingî. Kwoguo wîîra ûrûgamîîte Shanghai o na mûthenya ûmwe China no îkagîa na haathara nene mûno.

Ta rîu maûndû matiikaire weega tondû iwanja igîrî nene cia ndege kûu Shanghai nî irûûgamîtie thabaarî nyiingî. Ikanjîîte thabaarî cia ndege ikîrîîte magana keenda (over 900 flights).

Na no gûkírî mawîîra maangî maremeete gûthiî na mbere mîciî-inî mînene ya China, ya Shanghai na Yuhuan. No thirikaari nî îraamenya haathara îrîa îrî kuo.

Typhoon Dolphin îrookire na mbura nene mûno, îraarahia Shanghai na îîria iria imîthiûrûrûkîirie. No thirikaari nî îrutîîte wîîra mûnene wa gûthaamia andû arîa magûmîirwo nî mwaraho wa maaî. Nao nî ta andû mirioni îmwe.

Thirikaari îrutîîte nginya mbeeca getha andû mateithîke. Ta mûciî-inî wa Zheijiang, thirikaari îrutîîte ndoora hakuhî mirioni mîroongo îtatû cia gûteithia andû.

Kwoguo thirikaari nî îraamenya ti kwega, na nî îraageria kûhang’îra andû ayo getha macookerere mawîîra maao ma kawainda narua. Ireeka ûguo gûtigaagîtuîke atî Typhoon Dolphin îgûtiga ucuumi wa China ûinamîîte.