MP Kaguchia wa Mūkūrwe-inī nī ararekereirio na mbīīro ya ciriingi magana meerī ma mīroongo ītaano. (Ksh.250,000 cash bail).
Araarekereirio nī igooti thuutha wa mawakiri aake kūrītwarīra ihooya rīu.
Mathīīna ma MP Kaguchia
Mathīīna ma Kaguchia maambīrīirie mūthenya wa Kiumia, rīrīa aathiīte gībiindi-inī gīa Kīrīrīmbī, thitīcīni-inī ya Royal Media.
Ndeereti ya Kīrīrīmbī yarīīka, Kaguchia nī aamenyithirio atī eetereirwo nī mūharaandī wa ngaari hau nja ya kīhiingo. Gūthūūkia mūno, atī andū acio nīmeekunīkīīte moothiū ūndū ūtaangīmamenya.
Kaguchia agīkīmenya ndekuuma, toondū kwīgita ti guoya. O na nī mwoe mīario akiuga atī gūtirī hiingo angīītwara mūtego-inī akīonaga. Aakīraarire thituundio cia Royal Media gūgīkīa.
Rūciinī rwa Njuumatatū nīguo aarokeirwo nī maabithaa a borithi, no acio matiekunīkīīte moothiū. Na kahiinda-inī kau nī kūrī araata meekinyītie, ta Senator Richard Onyonka.
No mawakiri maake matiakinyīīte thituundio, no nīamahūrīire thimū o abithaa waarī hau akīmūhīkaga. Na akīmeera borithi nī iramūkuua. Gwatuīkaga atī borithi yeendaga gūkuua Kaguchia nīūndū wa mīario aatuīkīīte nīararirie mūcemanio-inī Nyīrī.
Igooti Kīambu Kūrekereria Kaguchia
Gūgīkinya mathaa ma thaa inyaanya Njuumatatū, mawakiri ma Kaguchia nī maathiīte igooti-inī gūtwara mateta igūrū rīa kūnyiitwo gwake. Naake Njaanji Njoki Mwangi akīruta waatho Mūhecimiwa Kaguchia arekererio, arīīkia kūrīha mbīīro ya keci, ciriingi ngiri igana.
Ūndū wa kūmakania nī atī Mūhecimiwa Kaguchia ndaigana kūrekererio. O na mawakiri maake gūthiī Kamūkūnji kūrīa aahingīirwo na kuuga ūrīa igooti rīoiga kūrooneka kwaarī o burī.
Kaguchia nī aakīraarire theero nginya kūraagīkīa ira. Na toondū mawakiri maake moigīīte nī maagiririo kūmwona ihiinda-inī rīu rīothe, Kaguchia araagīcookire gūkinyio igooti-inī na nguo o iria ehumbīīte Kiumia.
MP Kaguchia Gwìceembia
Araata me gatū a Mūhecimiwa Kaguchia nī marekinyīītie igooti-inī rīa Mirimaani tondū nīkuo aratwaarirwo nī borithi ira. Andū ta Senator Methū wa Nyandarūa maraarī hau.
Kaguchia kūrekererio atoonye igooti-inī rī – whi! Araagwo. Gūtiinamenyeka ūrīa harathiire, no Magistrate Nyangena areekorire ndarī na “hambusu”. Aragītigana na mūtaratara ūrìa arabaangīte, araathana atī mawakiri a Kaguchia mamūkinyie igooti-inī rīu.
Mathaa-inī ma thaa inyaanya mathiangīīte, MP Kaguchia aragīcooka igooti-inī, arī mooko-inī ma Senator Methū. Na ciira ūraagīthiī na mbere wa kūhooya atī mūmbuunge ūcio wa Mūkūrwe-inī arekererio.
No mawakiri ma Kaguchia nī maraambire mareera igooti kīrīa kīraatūmire Kaguchia oime igooti-inī hau kabere. Mareera “magistrate” atī nīo maramuumirie, na hinya wa waatho wa igooti rīa Kīambu. Yaani, mararūmīrīire rūūtha rūrīa Justice Njoki aaheanīīte Monday.
Magistrate Kūrekereria MP Kaguchia
Mawakiri ma Kaguchia nī maraaheire igooti mateta, nginya atī ūhoro wa borithi kūrega kwoya marūa ma igooti Monday. Mawakiri ma thirikaari namo maraheana macookio.
Thuutha wa gūthikīrīria mīario ya mawakiri ma mīena yeerī, “Magistrate” aratua itua. Aroiga MP Kaguchia arekererio thuutha wa kūrīha mbīīro ya keci, sh.250,000, kana aige mboondi ya mirioni īmwe.
Mūthenya wa Njuumatatū, mūtoongoria wa DCP Rīgathī Gachagua, marī na atoongoria angī nī maateteete mūno. Magīkīīra amemeerekia atī matiūī kūrìa Kaguchia arī, toondū o na mawakiri maake matirī maraahota kwaria naake.
No rīu nī andū akenu, toondū Mūhecimiwa Kaguchia aarīha “cash bail” nī ararekereirio o hau hau.