His Excellency Rîgathî Gachagua nî “General”

His excellency Rîgathî Gachagua nî mûhe ngerenwa njerû nî mûthuuri ûmwe mûtîîkanu Kenya. Mûthuuri ûyû nî Honourable Philip Kisia, na nî mûtaaramu wa maûndû ma ûtoongoria.

Kisia oigîîte atî Mûhecimiwa Rîgathî wa Gachagua nîehootanîire ngerenwa ya igûrû ya ûtoongoria, na nîamwongerera ndebe. Agakiuga atî kuuma rîu, arîîmwîtaga His Excellency General Gachagua. Yaani, taito ya His Excellency Rîgathî Gachagua ti njiganu.

Philip Kisia aatûire arî mwandîki mûnene wa mûciî wa Nairobi (Nairobi City Clerk). Aatuungatire gîtî-inî kîu kuuma 2009 nginya 2012, ûtoongoria wa Kaûntî ûtaananjia. Na mbere îyo aarûgamîrîire KICC.

Kisia Gûkûûngûîra Ûtoongoria wa His Excellency Rîgathî Gachagua

Mîaka-inî tûrî, Philip Kisia nîakoreetwo agîthathaûra maûndû ma ûteti. Niingî nî aheanaga mawooni maake, na andû Kenya ng’ima makamûthikîrîria na matû meerî.

Akîaria kiumia-inî gîîkî, Philip Kisia aroigire atî gîtîîo gîake kûrî Rîgathî wa Gachagua nî kîongererekeete na njîra nene ma. Akoiga gîtûmi nî gîthuurano gîa Karaû (Ol Kalou) kîa mweri ikûmi na ithaathatû (16/07/26).

Kisia aroigire atî, gîthuurano gîa Karaû (Ol Kalou) kîrîa kîîrîga gûthira nî kîonanîtie ûhoti wa Gachagua na njîra ya mwanya. Aroigire ûguo agîcookia ciûria mahonjiano-inî araarî namo na mwandîki ûmwe mwîthî wîîtagwo Jadiel Kabiro.

Akîeretha ûrîa akeneetio nî Mûhecimiwa Gachagua, Kisia aroigire atî nî aarûmîrîire ndeto cia Karaû hîîndî ya “by-election”. Atî akîrora na akîona ûrîa mûingî wa Karaû watwarithirio nî thirikaari hîîndî ya kambeini. O kîhiinda-inî kîu nî oonire mîtugo ya ateteri thirikaari, nginya maabithaa amwe anene thirikaari-inî.

Nî aagîcookire akîîrorera maûndû mûthenya wa gûikia kura. Na mûthia-inî areonera moumîrîra ma kura cia andû a Karaû. Aatukanîra maûndû macio moothe, aroiga: Nîndainamîria Rîgathî wa Gachagua. Mûûndû ûyû nî Njeenûrû.

Kisia agakiuga: Rîgathî areetîkîririe arûmîrîri aake mathiî mîcemanio ya thirikaari. Arameetîkîria mooe matega ma thirikaari. Aramataara matikoogite û kana û. Mareeka macio moothe, na thuutha mûtheri maraahe mûûndû waake wa mûng’ethanîro kura ta meekwenda. Gûthûûkia mûno, andû a Karaû maratîire mataaro ma Gachagua o na atakinyithîtie kûgûrû Karaû. Akorwo ûcio ti “General” nûû?

Kenya îrî Tayaarî Gwîka ta Karaû 2027

Ûndû ûngî ûkeneetie Philip Kisia nî gûkorwo andû a Karaû maroonanirie ûrîa Kenya ng’ima îraigua. Oigîîte atî nî ûndû wa kûraakaria mûûndû, kuona harîa mûtongoria wa bûrûri aigîîte raiya. Atî eetîkîîtie no eeke o ûrîa aangîenda ona andû mateegûkena, bata nîacooke amahake na mbeeca.

Rîu araitire mbeeca ta mahuti Karaû o rîrîa mûnjuumbe waao aakua, nîguo andû a kûu mamûthuurîre mûûndû. Matiinagîîka guo.

Ararîmarîma bara matûire meetereire, arariûkia mûûgithi, aramatwarîra tûtarû ndeemu-inî, no macio matiinatûma maceenjie kura ciao.

O na thirikaari yaamarehera tûmeeko twa kûruga na tûmîkoondoro, maraarûmirie ûndû weeragwo hîîndî ya Mûthee Jomo Kenyatta. Atî kura nî thiri. Mûûndû araingîraga ha gûikîria kura, ageekîra rûûri ha Sammy Kamau Ngotho, akeyuumîra. Na arîa atare maragîikîirie andû angî kura matinoorio nî mûûndû.

Kisia agakiuga atî, ûguo noguo andû mageeka Kenya yoothe gîthuurano-inî kînene gîa 2027. Toondû andû a Karaû, na His Excellency
Rîgathî Gachagua, nîmaroonanirie no kûhoteke mûndû athuure mûndû ûrîa we mwene eekwenda.

Maroonania to mûhaka andû meetîkîre kwenderio guoya. Na mûno mûno, maroonania atî no meecokerie gîtîîo kîrîa maagithîîtio.