Bûrûri woothe wî na kîeha ûgîcakaya ciana irahîrîire thukuru, rîrîa mwaki mûnene ûraakanire nyûûmba-inî yaao ya toro.
Ciana ikûmi na ithaathatû (16) cia thukuru wa Utumishi Girls Academy kûûrîa Girigiri, Naikuru, nî ikuîte. Irooragirwo nî mwaki mûnene ûrîa ûraakanire nyûûmba-inî yaao ya toro, kana ndoomitorî.
Mwaki ûcio ûratuîka ûraanjirie ta thaa mûgwanja ûguo cia ûtukû, arutwo me toro. Nyûmba îyo îrahîire îraarî na ciana ta magana meerî (200).
Aciari Kûrooka Thukuru Ngware
Aciari aingî nî mararookire kîrooko gîa tene mûno rîrîa maraiguire ndeto îno. Maraakinya mamakîîte mûno, no matiinamba kûmenya biû ûhoro wa mwana o mwana. Kwoguo nî maraikaraangire na wagaagu o kahiinda, nginya maabithaa a borithi maambe mathoome ûrîa haandû hau haraikaire nî ûndû wa ûthuthuuria.
No maracookire maraheeo ûhoro, na maramenyithio atî ciana nî nyiingî ndeng’erie thibitaarî nîûndû wa gûtaangîrwo.
Maabithaa a Thirikaari Kwaria
Minista wa Gîthoomo bûrûri-inî, nîwe CS Julius Ogamba, nîaraarîirie aandîki a moohoro o ira, thaa ithaano ûguo cierekeire na nuthu.
O akîonanagia kûritûhîrwo nî ûhoro ûcio, Ogamba nîaroigire atî namba ya arutwo arîa marakuire nî ikûmi na ataandatû (16). Nayo naamba ya arîa maratwarirwo thibitaarî mathoondekwo nî mîroongo mûgwanja na keenda (79).
Harî acio 79, mîroongo mûgwanja na ûmwe (71) nî mararekereirio mainûke thuutha wa gûthimwo na gûthoondekwo thibitaarî-inî ya St. Joseph o kûu Girigiri.
Mûgwaanja nao atî nîmaratigirwo thibitaarî magîthiî na mbere kûrigitwo.
Hau mathaa-inî ma rûciinî, ndagîtaarî mûnene thibitaarî-inî îyo nî arerîîte amemeerekia atî nîkûrî mûrutwo ûrakuuirwo nî aciari ake, akarigitîrwo thibitaarî îngî.
CS Ogamba nîaroigire atî no nyûûmba îmwe ya toro îrahîire, îkomagwo nî ciana ta magana meerî (200). No atî thukuru îraarî na arutwo magana manaana ma anaana (808) mwaki ûtaananjia. Nîaroongereire atî korwo ciana ciothe cia thukuru ûcio iraarî kuo, thukuru îngîraarî na ciana magana manaana ma ikûmi na ataano (815).
Minista Murkomen Kwaria
Minista wa maûndû ma thîinî, Kipchumba Murkomen, nîaraarîirie amemeerekia thuutha wa CS Ogamba kwaria. Araanjia na kûheana rambirambi ciake kûrî aciari na bamîrî iria ciana ciao irakuîrîire thukuru wa Utumishi Girls.
Nî aracookire aracookeria ngaatho andû oothe arîa marateithîrîirie gûthara ciana na kûhoria mwaki. Aracookeria ngaatho ikuundi cia Kenya Red Cross, thima moto, borithi, KDF, na andû a îîria îyo.
Nîaracookire arahooya atî andû mahoorere, meetere ûthuthuuria wa mwaki ûcio wîîkwo, matekwenda kûheana ndeto cia kwîgereria. Aroiga atî ûthuthuuria warîîka, thirikaari nî îkaanîrîra moumîrîra.
CS Murkomen nî aracookire arooria andû marûûgame na bamîrî iria ciana ciao irahuutirio nî mûtino ûyû. O na nî aragwetire atî, ciana nyiingî iria ithoomagîra thukuru-inî ûcio nî cia maabithaa a borithi.
Aakenya Kûgegio nî Uhoro ûyû wa Mîaki Mathukuru-inî
Kahiinda-inî gaaka, andû Kenya nî magagaîtio nî mûtino ûyû wa thukuru ya Girigiri, Naikuru. Na mûno mûno makarigwo nîatîa kûraathiî toondû nî kûraarî na mwaki ûngî thukuru îngî o gûûkû Kenya thikû nyiinyi hîtûku.
Magakîhooya ûhoro wa mîaki thukuru ûkinye mûthia. Ciana cia thukuru ikoragwo irî mwîhoko wa aciari, atî nîmagateithia gûthoondeka bûrûri harîa aciari makinyîtie. No gîthoomo kîao kîîngîthûûka, no kûgîe na andû aingî a kûruta thogothogo ta ingî icookete kwoneka mabûrûri-inî maangî.