Mbaara îrîa îraathiî na mbere Iran îreheete maûndû maingî mûno, tondû araata amwe matireenda kwonana, na andû angî kawainda mageithanagia nî kwaga wîîki rîu mahaanîîte ta araata.
Ta rîu President wa Amerika ndareenda kûigua Ngeretha îkîgwetwo, na Amerika na Ngeretha matûire me ndûgû. No gîtûmi nî toondû, Ngeretha na mabûrûri maangî ma rûraaya nî maraaregire kûingîrîra mbaara ya Iran, o na Trump ameera marute meeri na mbirarû ciao.
We aroona ûrîa mabûrûri macio maregete gûteithia Amerika, akariganîrwo atî o nao nîmaroonire amairîîte nî gûtuthûra mbaara Iran atamerîîte. Ta mûtugo, mabûrûri maya meerî, hamwe na maangî ma gîkuundi kîa NATO, nîmacookanagia nduundu mataanathiî mbaara-inî.
Pakistani Nî Îrageria Kûnyitithania mîario Gatagatî ka Iran na Amerika
Thirikaari ya Pakistani nî îîrîga kwîrutîra îtuîke ya kûnyiitithania mîario gatagatî ka Iran na Amerika, ûhoro ûkoniî kûniina mbaara îrîa îraathiî na mbere.
O na akorwo Israeli mararûa me mwena ûmwe na Amerika, Prime Minister wa Israel, Benjamin Netanyahu, ndaragweta ûndû wa mbaara gûthira. No President wa Amerika nîareenda mbaara îthiraange tondû andû a Amerika ti akenie nîyo.
India Îroigire yo Ndîrî na Bata wa Gûtuîka Mburûûka
Ciama cia mûng’ethanîro cia India, mûno mûno kîîngî gîtagwo Congress Party, nîirahaana ta iingînyûrûria thirikaari ya Prime Minister Narendra Modi, nîûndû wa kwaga kwîyuumîria kabere yooe kamweke ga kûnyiitithania mîario gatagatî ka mabûrûri maya maraarûa Iran.
Magagîtua atî rîu andû a thî yoothe ta mekuona ta Pakistan arî bûrûri wa bata gûkîra India. No Minista wa Maûndû ma na Nja, S. Jaishankar, aramacookeirie arameera atî India nî bûrûri wîkindîire, na wîîtîkîtie. Aroiga atî India ndîraabatario nî gûcaria wîîra wa mburûûka getha îtaambûrwo.
Yo Amerika nîyeendaga ndûgû ya India hiingo ciothe, toondû gwa kawainda, nî kûrî mabûrûri maigana ûna makuhîrîirie India na nî magianaga na Amerika na njîra itiganîîte. O na niingî mwonere wa maûndû mwathanîre-inî ûgakorwo wî na ûtiganu mûnene. Mabûrûri maya nî ta China, Myanmar, o na nginya Pakistan. Ta rîu Pakistan na Amerika maanathogothana ûhoro ûkoniî Afghanistan, bûrûri ûhakanîte na Pakistan.
Na niingî India nî bûrûri wîhoteete na maûndû maingî na ndûturagîria Amerika ndu ûteithio. Kûmenya ûguo gûgakîhe India ûrûme wa kuuga “tûtiigûtharana ûmburûûka ithuî”.