Thî ya Afrika Kwîhotanîra Mûbiira-inî

Thî ya Afrika nî yonanîîtie ûhootani mûnene mathako-inî marîa maraathiî na mbere ma mûbiira. Tayaarî kûrî na tiimu îmwe ya Afrika îkinyîîte robo ya mûthia wa mûbiira ûyû.

Thî ya Afrika Îrî na Tiimu Ciigana Mûthaako-inî Ûyû?

Tiimu cia Afrika iria ciahootanire kûingîra mûbiira-inî ûyû wa thî yoothe nî ikûmi. Nacio nî Moroko (Morocco), Misiri (Egypt), Koongo (DRC), Afrika ya Mûhuro (South Africa), Cenego (Senegal), Ngaana (Ghana), Tiunîcia (Tunisia), Kîbû Baande (Cape Verde), Koo ndi Boa (Cote d’Ivoire), na Aronjîîria (Algeria).

Kwoguo, tiimu cia mûbiira cia mabûrûri maya ikoreetwo igîthaaka na tiimu cia thî yoothe iria ciahootanire kwao. Timu icio ciothe ikoreetwo igîthaakîra mûbiira ûyû wa magûrû wa thî yoothe (World Cup) mabûrûri-inî matatû ma rûraaya.

Mabûrûri macio nîmo Amerika (America), Kananda (Canada), na Megiciko (Mexico).

Mûbiira ûyû wa thî yoothe wa mwaka wa 2026 waambîrîirie gûthakwo mweri ikûmi na îmwe wa gataandatû (11^th June). Na mûbiira wa mûthia ûgathaakwo mweri ikûmi na keenda wa mûgwanja (19^th July).

Thî ya Afrika Îtigarîtie Tiimu Ciigana Mûbiira-inî?

Tiimu iria itigarîîte mûbiira-inî rîu, yaani tiimu inyaanya, nî tiimu cia kûinamîrio. Ici nî tiimu iria îhooteete ingî cia thî kuuma gîkuundi-inî kînene ma.

Mûbiira ûyû wa thî yoothe nî wa mîroongo îîrî na îtatû (23^rd) kuuma rîrîa mûthaako ûyû waambîrîirie. Na ûthaakagwo thuutha wa mîaka îna.

Na mwaka ûyû ûraarî na ûgarûrûku haniini. Haandû ha mûthaako kwanjia na tiimu mîroongo îtatû na igîrî (32), ûranjirie na tiimu mîroongó îna na inyaanya (48).

Thuutha wa maciindano maingî, tiimu nyiingî nî irîîkîîtie kûrutwo. Na rîu itigaire tiimu inyaanya, iria îkaanjia kîhîtahîtano kîîngî rûûciû, mweri keenda (9^th July).

Thî ya Afrika îrûgamîrîirwo nî tiimu ya Morocco. No tiimu ya Misiri îraahîtirie haniini mûno kûingîra ho. Îreerûmirie biû îgîthaaka na Argentina hwaaî, mathaa ma gûthaaka maraathira îtarî nyiingîrie ngoori o na îmwe.

Mûtino mûûru nî atî, gwakinya kûhûûrwo beenotî (penalty shootout), Misiri nî îrahootirwo ithatû kwa igîrî (3:2).

Morocco Îgathaaka Mûthenya wa Mbere wa “Quarters”

Rûûciû nîguo mûbiira wa thî yoothe ûkaambîrîrio robo yaaguo (quarter finals).

Tiimu cia Moroko na Baraanja (France) nîcio ikaambîrîria gîteengo gîîkî, na igaathaaka thaa ithaano cia ûtukû (9^th, 11 p.m.) cia Kenya.

Mûthenya ûcio ûngî, Gataano, Mberonjiam na Thibîini (Belgium vs Spain) ithaake thaa inya cia ûtukû (10^th, 10 p.m.).

Naguo Njuuma, Ngeretha na Norwî (England vs Norway) cianjie mûthaako thaa thita cia ûtukû (11^th , 12 midnight).

Mûico-inî nî tiimu cia Thwitharaandi na Anjentina (Switzerland vs Argentina) igaathaaka. Nacio igaathaaka mûthenya wa Kiumia thaa ikûmi gûgîkîa (12^th, 4 a.m.).

Gûgîthererûka Kiumia, thî yoothe nî îgaakorwo îmenyeete gîkuundi kîgima kîrîa gîgaathaaka mbere ya mûthaako wa mûico biû. Na njîra nguhî, tiimu inya nî îkaanjia kûrutwo kuuma rûûciû. Mûthia-inî hatigare tiimu inya iria igaathaaka “semi-finals”.

No mbere ndaaya harî thî ya Afrika, bata mûnene nî tiimu ya Morocco îhoote France rûûciû. Kûûngîthiî ûguo, no kûgîe na ndûûhiû na mbugîrîrio Afrika. Ti maita maingî tiimu cia Afrika ikinyaga “quarter-finals” kana “semi-finals”.

Kwanja tiimu ya Morocco no yo iika îrî yaakinya “semis”. Na nî maciindano-inî ma hîîndî îyo îngî: “World Cup” ya 2022, na îgîtuîka naamba inya.

Thî ya Afrika no Îkuue Gîkoombe?

Îî, gûtirî tiimu îtangîkuua gîkoombe kîa “World Cup”. Bata nî tiimu îtuthûre icio ingî cia mûng’ethanîro harî “quarter-finals”, “semi-finals”, na “finals”.

Morocco îîngîhoota France rûûciû, ngoro cia andû a Afrika no ciigue weega mûno.

Mathaako maya ma mûbiira wa thî yoothe makaarîîka mweri ikûmi na keenda mweri ûyû (19^th July, 2026).