Mûnene wa bûrûri wa Amerika, Donald Trump, nîatigîîte andû aingî mamakîîte nî kuona ûrîa araandîkire thuutha wa gîkuû kîa abithaa ûmwe wa tene thirikaari-inî.
Abithaa ûcio wîîtagwo Robert Mueller III, araakuire ira thuutha wa kûrwaara mîaka îigana ûna, na araarî na mîaka mîroongo înaana na ûmwe (81).
Andû aingî nî macakaîîte na bamîrî yaake, na makaririkana ûrîa atuungatire bûrûri waake wa Amerika na kwîrutîra kûnene ma. No Trump araahiûkire mûtandao-inî araandîka atî nî akeneetio mûno nî gîkuû kîu.
Gîtûmi Kîa Marûrû ma Trump
Gîtûmi kîa Donald Trump akorwo na marûrû maingî ûguo nî atî, Robert Mueller aheeo wîîra wa ûthuthuuria nî gîteengo kîa waatho gîa thirikaari mwaka-inî wa 2017, aûrutire na njîra nûngarû, ateegwîtîkîra kûgucîrîrio nî mwena ona ûrîkû. Trump agîkîraakara, tondû nîonire nîekuumbûka atî nîekire maûndû ma uungumania nîguo ahoote gîthuurano gîa 2016.
Hîîndî ya gîthuurano kîu, Trump maaciindanaga na Hillary Clinton, ûrîa waarî mûtumia wa President wa hau kabere, Bill Clinton.
Na ona toondû Trump aamenire Mueller, abithaa ûcio no amûhonokirie. O na oneete atî hîndî ya “kampeini” bûrûri wa Russia nîwateithîrîirie kûmûgana na gûthûûkîrîria Hillary Clinton na njîra nene ng’enda-inî, yaani makîhûthîra “internet” kwandîka maheeni ma “propaganda”, ndaigana kûheana mûrûgaamo atî nî weega Trump aciirithio kana arûgamio wîîra.
Robert Mueller Aatigire aiga Rekoondi kwa FBI
Hîndî îrîa Mbunge ya Senate ya Amerika yacaragia abithaa ûrîa mwega wa gûtoongoria ûthuthuuria wa gîthuurano kîa 2016, nîyetîkanîirie atî Robert Mueller III nîwe waagîrîire. Ameemba acio magîcooka makîongerera atî Amerika ndîrî yaakorwo na mûnene (Director) wa FBI mûgaacîru wîîra-inî ûcio ta Mueller, harî mîaka igana îrîa yathirîîte kuuma gîkuundi kîu kîûmbwo. Senate îgîkîhûûra mûkoonde kwa ûingî, atî Mueller atuîke “Special Counsel” wa gûtoongoria ûthuthuuria ûcio: abithaa wî na wîyaathi, ûtangîûrio kîûria nî mûûndû ona ûrîkû, nginya President.
Gîthoomo na Wîîra wa Robert Mueller
Robert Mueller aarî na gîthoomo kînene. Aambire agîthiî Yunibacîtî îrî gatû ya Princeton mwaka-inî wa 1966, akîgîa na ndingirii ya mbere. Mwaka ûyû ûngî akîingîra New York University (NYU) akiuma kuo na Masters.
Kuuma hau akîingîra jeshi mwena wa Marines na agîthiî kûrûa Vietnam. Kûu akîheeo tûturua, na hîîndî îrîa oimaga jeshi nîûndû wa kûumia kûgûrû, akinyîîte gîturwa gîa Kapteni (Captain).
Robert Mueller no eendaga ûndû angîtuungata bûrûri waake o na akorwo rûgeendo rwa gûkorwo arî mwanajeshi nîrwakinyire mûthia. Maacokania nduundu na mûtumia waake, akîona reke athoomere waatho. Agîkîingîra Yunibacîtî ya Virginia akiuma kûu na ndingirii ya waatho mwaka-inî wa 1973. Akîandîkwo nî thirikaari gîteengo kîa waatho (Justice Department).
President George W. Bush nî acookire akîmûthuura atuîke mûnene (Director) wa FBI mwaka-inî wa 2001. Nîarutire wîîra wî hinya toondû, hîndî îrîa itoi cia Al Qaeda cianyiitire ndege inya cia Amerika mateeka na ikîmomora kînyûûmba kînene mûciî-inî wa New York kîa World Trade Center (WTO), akoreetwo arî gîtî-inî kîu kîa FBI Director o kiumia kîmwe.
No ûhootani waake wîîra-inî ûcio nî waatûmire President Obama amwongerere mîaka îngî îîrî rîrîa atuîkire Raisi, agîgîkorwo arî gîturwa-inî kîu mîaka ikûmi na îîrî. Waatho wa Amerika uugîîte abithaa ndakaahîtûkie mîaka ikûmi gîturwa-inî kîu.
Maabithaa arîa maarutithanagia wîîra na Muellar nî mooî atî nî mûkaari na wîîra, no niingî makamwenda mûno tondû nî aarekaga marutithie ûûgî na ûmenyo waao wîîra. O na nîwe waarî gîturwa-inî rîrîa abithaa ûmwe wa FBI eoneire na akiumbûra njîra njûru cia ûthuthuuria iria gîteengo kîa CIA kîahûthagîra, cia kûnyamaaria andû arîa anyiite na gwîkûîrwo, nîguo maheane ûira ûrîa mooî. Na ûhoro ûcio ûgîkîrûûngwo.
Amerika nî îraacakaya Gîkuû Kîa Robert Mueller
Kahiinda-inî gaaka, bûrûri wa Amerika ûthiîte na mbere gûcakaya gîkuû kîa Robert Mueller III. Makoiga atî gîkuû gîake nî gîakururîra gîcigo kîmwe kîa “historia” ya Amerika.
Harî andû arîa macakaîîte na bamîrî ya mûtigairî nî atoongoria eerî a bûrûri a kabere arîa maarutithanirie wîîra nake weega, na nîo President George W. Bush na President Barack Obama.
Mûtigairî aatiga mûtumia waake wîtagwo Ann Cabell Standish, ciana igîrî cia airîîtu, na tûguuka tûtatû.