Dr. Oburu Odinga (Facebook Photo)
Theenīta Oburu Odinga areerire kamītīī ya “energy” ira Keerī atī nīarekia gītī kīa mūikarīri gīturwa wa kamītī īyo. Nayo kamītī īyo ndīīnarīa marīīgu. O hau hau īreera mūniini waake Theenīta William Kisang ooe gīturwa kīu atuīke “chairman”.
William Kisang aatuīkire theenīta mweri wa Njanūeri 2023, rīrīa kwagīire ithenya Elgeyo Marakwet. Narīo ithenya rīonekire rīrīa Raisi Ruto aaheire Kipchumba Murkomen, ūrīa wahooteete gītī kīu, kamweke ga kūingīra thirikaari-inī arī “Cabinet Secretary”.
Oburu Odinga Araarekirie Gītī Nīkī?
Oburu aroigire atī araarekia ūtoongoria wa kamītī īyo hau hau, na nī toondū wa itūmi ataangīhota kwīrica. No nī aracookire aroongerera atī gūtikaagīe mūūndū ūkuuga atī nī kūrutwo aarutwo gītī-inī kīu.
Oburu Odinga nī mūrū-a-nyina mūkūrū na mūtigairī Raila Odinga, ūrīa waatūire atongoreetie kīama kīa ODM. Raila Odinga ahuurūka mwaka mūthiru, ODM īgīkīona ītue Oburu mūtoongoria, hiihi getha kīama gītikaagīe na ngūī cia ūtoongoria.
Oburu Ooire Ū-Chairman wa Kamītī ya Energy Rī?
Oburu Odinga aatuīkire “chairman” wa “energy committee” mwaka-inī wa 2025, mweri-inī wa Keerī (February). Kaarī kahiinda andū maarutūrūragwo itī-inī nī gūkorwo maanyitīīte mbaru mūniini wa President wa kahiinda kau, Rīgathī Gachagua.
Naake Gachagua aakoreetwo aahang’ūrwo gītī-inī kīa ū-Deputy President. Ūguo nī kuuga Oburu Odinga aaikarīire gītī kīrīa gīaikarīirwo nī Senator Wahome Wamatinga wa Nyīrī hau kabere.
Na hīīndī īyo kūrī o ahecimiwa angī maikirio nja. Ta Karūūngo wa Thang’wa wa Gīthūngūri aarī mūikarīri gītī wa kamītī ya mabarabara. Naake Senator James Mūrango wa Kīrīnyaga ūrīa waarī mūikarīri gītī wa kamītīī ya ngirigaca no aikirio nja.
Niingî no kwarī na Senator Methū wa Nyandarūa, ūrīa waarī mūikarīri gītī kamītī-inī ya maūndū ma mathiingira na ūtoonga wa kīīmerera. Ūcio naake akīhagūrwo.
Ūguo ndwaiganire. Senator Joe Nyūtū wa Mūrang’a o naake nīarutirwo kamītī-inī ya gīthoomo, īrīa aarī mūūmemba waayo.
Kūrekia Gītī kwa Oburu Odinga nī haathara kwī ODM?
Gūkorwo theenīta arī mūikarīri gītī wa kamītī ya “energy” nī kūmūheithagia gītīīo kīa mwanya. Niingī nī kūmūheaga kamweke ga kūnyiita itemi ndeereti ikoniī mūcarīrie na mūramatīre wa ūtoonga wa būrūri, na mawaatho maūkoniī.
Aamemba a kamītī īyo o nao no maroragwo na tūmaitho twa ūiru. Toondū o nao no mendithīrīrie ūndū mūna ūkoniī ūtoonga ūyū, kana maikie maciindano mathūūkīrīrie.
No kīama kīa ODM kīrī ruungu rwa Oburu Odinga, nī kīarekereirie Edwin Sifuna arutwo. O na gūtuīka Sifuna acookirwo gītī nī thenīta wa ODM, Moses Kajwang, kīama gītirigīītwo nī bata wa mūndū ūūragia ciūria atarī na guoya.
Kahiinda-inī gaaka, Oburu Odinga aratoongoria mūreengo wa ODM ūrīa ūnyiitaga mbaru thirikaari ya President William Ruto. Naake Edwin Sifunà agatoongoria mūreengo wa Linda Mwananchi, ūrīa ūreenda President Ruto ndagaathane taamu īngī.
No ūrīa kūrī nī atī, Sifuna na Linda Mwananchi nīmakīrīrīirie kūgīa ngumo būrūri-inī. Na no gūkorwo ūcio nī ūndū ūmwe wacūūngīrīirie Sifuna kūrutwo kamītīī-inī ya hinya. Ūndū ūrīa ūhaana ta ūrī kīriga nī kīrīa kīracūūngīrīirie Oburu kūrekia gīturwa gīa Senate Energy Committee kahiinda-inī gaaka.
No mūndū arongooreria, nī aroona ta Oburu ateerīgīrīire kūrekia gītī kīu mīeri īīrī mīthiru. Yaani, hiihi ndataanyaga no gūthiī ūguo rīrīa mūreengo wake wa Linda Ground wacinagīrīra Sifuna arutwo kamītīī-inī.
Hīndī īyo, hiihi no gūkenerera akenagīrīra ūrìa Linda Ground yanyiitagwo mbaru nī matheeneta ma UDA. Ūmūūthī ūyū, gītī kīu gīkoragwo gīkīmererio mata, kīu araikarīire nginya mūthenya wa ira, kīrī na mūndū wa UDA.
Kīama kīa UDA nīkīo gīa President Ruto, na nīkīo kīrī hinya mūno mūūngano-inī wa Kenya Kwanza ūrīa ūmbīīte thirikaari. O na kūrī o ūguo, kūhaana ta mūreengo wa ODM wa Linda Ground watuīkire wa kūnyiita thirikaari mbaru ūtarī kīūria.
Rīu Atīa Uhoro wa Linda Ground?
Rīu maitho moothe marī harī mūreengo ūcio Oburu Odinga atoongoragia. No mūhaka andū meende kwona ūrīa mekwoya ndeto īno ya Oburu kūrekia gīturwa kīnene gīa kamītīī ya “energy”.
Kamūira kau rī, Aakenya maahota gūkorwo makīīūria ūū:
Rīu ODM yūrīirwo maita meerī ī, kana no Linda Ground yūrīirwo? Ī kana hiihi gūtirī kūūrīrwo ODM īrī yoothe yūūrīirwo?
No o ūrīa aanja īrī, nī kūrī ūndū ūtarī hinya gwītīkanīria. Naguo nī atī UDA nī īgunīkīīte nī Oburu Odinga kūrekia ūtoongoria wa kamītī ya “energy”. Andū nī mararora makoona atī William Kisang ūrīa ūracookire gītī gīake nī wa UDA.
Kisang, ūrīa ūkoreetwo arī mūniini wa Odinga kamītī-inī ya “energy”, aingīrire Senate kīambīrīria-inī gīa 2023. Na aingīrire thuutha wa kūhootana gīthuurano kīniini kīa Elgeyo Marakwet. Gīthuurano kīu gīatabanīirio rīrīa Senator Kipchumba Murkomen aarekirie ū-Senator. Naake aūrekirie rīrīa President Ruto aamūheire gīturwa gīa “Cabinet Secretary”.