Andû a Afrika ya itherero nî maraaririkanio ûhoro wa President wa gataano wa bûrûri ûmwe gûûkû, nîûndû wa gîkuû kîa nyina.
Suzana Ngolo Musa, nyina wa President John Pombe Magufuli, ûrîa waarî mûtoongoria wa gataano wa bûrûri wa Tanzania, nîarîîkîtie kûhuurûka. Kûreerîkana arakuire hwaaî, 25/05/26.
Magufuli aakuire mwaka wa 2021, arî President. Oeete waathani wa bûrûri mwaka-inî wa 2015.
Ûhoro ûyû ûrahithûririo nî mwarî wa Magufuli wîtagwo Jesca. Araakiuga atî cûûwe arakuîrîire mûciî gwake, Chato, thuutha wa ndwari ya kahiinda karaaya.
Suzana Magufuli araarî mûtumia mûtîîkanu itûûra-inî.
Rambirambi Nyiingî Gûtûmwo
Baamîrî ya nyina Magufuli nî îraathiî na mbere kwamûkîra ndûmîrîri cia macakaya. Kwanja maabithaa a thirikaari nîmaciirûmîîte mûno.
Mûtoongoria wa bûrûri, Samia Suluhu Hassan, nîacakaîte gîkuû kîa nyina Magufuli. Agagîtûma rambirambi haandû-inî haake na ha thirikaari ya Tanzania î yoothe.
Suluhu aarî mûniini wa Magufuli ataanakua. Na thuutha wa gîkuû kîa Magufuli akîoya gîturwa gîa ûtoongoria, kûriingana na waatho wa bûrûri.
Mûniini wa President, Dr. Emmanuel Nchimbi, o naake nîatûmîîte ndûmîrîri ya macakaya kûrî baamîrî ya nyina Magufuli.
O na mûtoongoria wa gîcigîrîra kîa Zanzibar, Dr. Hussein Munyi, nîatûmîîte ndûmîrîri yaake ya macakaya. Oongereire atî bûrûri nî worîrwo nî mûtumia wa bata.
Gîkuû gîa Suzana Magufuli nîkîraaririkanirie andû a Tanzania President Magufuli. Magakîririkana atî nîta mîaka îtaano kuuma ahuurûka. Aakuire 17/03/21, na akuîrîire thibitaarî ya Mzena, mûciî-inî wa Dar-es-salaam.
Arîa oothe matûmîîte rambirambi ciao marahooya Ngai aige roho wa mwendwo nî irî haandû heega matu-inî.
Gîkuû gîîkî gîoka o kiumia kîrîa kûrî na thigûkû ya Aithîramu. Kwoguo nî ûhûthû andû aingî mahote gwîtwara o ene kwaa Magufuli, makaheane rambirambi ciao, tondû gûtikîrî wîîra. Thigûkû ya rûûciû nî ya Idd-ul-Adha. Nayo îrîa yaarî kuo mweri wa Gatatû yaarî ya Idd-ul-Fitr.