Jeshi ingî ithathatû cia bûrûri wa Amerika nîikuîte kiumia gîîkî, o thogothogo-inî îno ya mbaara ya Iran.
Gûtiîrîkanîîte biû ûrîa kûrathiire ndege îyo îreekora mûtino-inî, no nî kûûîkaine atî ndege îyo ndîraarî iiki.
Kwa mûnyaka, ndege ya keerî nî îraahotire gwîthara îraathiî kûgwa bûrûri-inî wa Israel, o îkîhîaga mûting’oe.
Rîu naamba ya jeshi ya Amerika îrîa îkuîrîire mbaara-inî îno ya Iran nî îrîkîîtie gûkinya ikûmi na atatû (13). Ûmwe aakuîrîire Saudi Arabia, na angî ataandatû bûrûri-inî wa Kuwait.
Mûtheemba wa Ndege
Ndege icio cierî iroonire mûtino mbaara-inî nî cia mûtheemba wa KC-135. Amerika nî îkoretwo îkîhûthîra ndege mûtheemba ûyû kwa ihiinda inene, rîîgûkinya o mîaka mîroongo îtaandatû (60). Ndege ici nî irî ûguni mûnene toondû ikuuagîra ndege iria irî rîera-inî maguta, igagîciongagîrîra nîguo ithiî na mbere na mbaara itekûbatario nî gûcaria kîhaaro kîa ndege gîa kûgûa.
No o na kûrî ûguo rî, nî irî gaathoro: itirî indo cia gûteithia arîa me thîinî gûcuka ndege na kûûmbûka kahora meerekeire thî, hîîndî îrîa ndege îîngînyiitwo nî ûgwati. Ûguo nî kuuga itirî “parachute”.
Arîa maumiîte nî aingî a Jeshi ya Amerika
Jeshi cia Amerika iria iumiîte harî ciumia ici igîrî Amerika na Israeli makoreetwo magîtharîkîra Iran nî nyiingî. Kîambîrîria-inî gîa kiumia gîîkî, “Pentagon”, îrîa arî yo waabici nene biû ya maûndû ma ûgitîri (defense) Amerika, yoigire atî “wanajeshi” a Amerika arîa matiihîîtio kana kûumia na njîra mwanya mwanya mbaara-inî îno nî akinyu igana rîa mîroongo îna (140). “Pentagon” îgacooka îkoongerera atî harî andû acio 140, anaana maumiîte na njîra njûru.
Ngavana wa gîcigo kîa Ohio kûûrîa Amerika nî acakaîte na baamîrî cia acio maraakuire na ndege kiumia gîîkî, na aragweeta atî atatû harî acio ataandatû nî a kuuma gwake Ohio.