Ndagîtaarî ûmwe wa Kenya nî mûtaambûre rûraaya. Arataambûrirwo nîûndû wa ûthuthuuria wîgiî mûthoondekere wa “Cancer” ya mûmero (throat cancer).
Ndagîtaarî ûmwe mûnene wa Kenya, nîwe Professor George Njoroge, nîaheetwo ngerenwa nîûndû wa wîîra waake harî ûthuthuuria wa mûrimû wa kaansa (cancer) ya mûmero.
Professor Njoroge akoreetwo akîrutîra wîîra thibitaarî-inî ya Kenyatta University Teaching Referral and Research Hospital (KUTRRH). Ngerenwa îrîa araheeirwo îîtagwo “Greater Manchester Cancer Award”.
Ngerenwa îyo îrareehanire na kîmaanjîka kîa mbeeca. Nacio nî ciriingi mirioni magana mana ma mîroongo îna na ithaathatû (sh.446 million).
Professor Njoroge araheirwo mbeeca icio nî gîkuundi kîmwe kîa Ngeretha, kîrîa kîrûmbûûyagia maûndû ma ûgima wa mwîrî. Gîîtagwo National Institutes of Health.
Ûhoro wa “Cancer” ya Mûmero
Kwonekeete atî “cancer” ya mûmero nî yûûragaga andû makinyîîte ngiri inya cia magana mana (4,400) bûrûri-inî wa Kenya o mwaka.
Gîtûmi gîa ikuû icio kûingîha ûguo kûraatuîka nî ûrîa mûrimû ûcio ûtamenyekaga tene.
Professor Njoroge araarutire wîîra wa ûthuthuuria, kûgeria gûcaria njîra cia kûmenya mûrimû ûyû wa “cancer” ya mûmero ûgîceema mûûndû.
“Project” îyo yaake îragîciinda kîhîtahîtano kîraarî kuo Ngeretha. Araanîrîirwo gûciinda ngerenwa na mbeeca mweri mîroongo îîrî na igîrî mweri ûyû (22/05/26).
Ciriingi Mirioni sh.446 nî Iheetwo Wîîra?
Ciriingi icio mirioni sh.446 nî cia gûteithîrîria Professor Njoroge gûthiî na mbere na ûthuthuuria wa “cancer” ya mûmero.
Oneete atî, mûrimû ûcio ûûngîmenyeka tene, ikuû no inyiihanyiihe.
Ûguo nî kuuga atî, ndariiri cia mûrimû ûcio no cioneke tene na mûrimû ûthoondekwo na ûhone.
Mûbaango nî Professor Njoroge ahote kûgîa na kirinîki îngîthaamathaamio (mobile clinic). Kwoguo andû matwarîrwo ûrigitani harîa marî; o na akorwo no kwambîrîria haarîa ûthuthuuria-inî.
Tayaarî Professor Njoroge nîathoomithîtie aruti a wîîra magana keenda (900) ûhoro wa ûthuthuuria wa mûrimû ûyû wa “cancer” ya mûmero.
Naake we mwene nîarigitîîte arwaru makîria ma ngiri îmwe (>1,000). Akamathoondeka nginya ûtûûro waao ûkaagagîra, na mûtûûrîre waao ûkaraiharaiha.
Ta rîu korwo magooti marîa thirikaari yûûnganagia manyiitagîrîra mawîîra ta maya ma Professor Njoroge, gûtiingîgîîaga na inegene inene ta rîrîa rîrî kuo rîu.