Nîgûkoretwo na ikuundi iranyiita andû mateka mabûrûri-inî ma Gulf, na itûmi ciao itiraamenyeka. No mûno kûrooneka ta meerekeirie ûndû ûcio oongania a moohoro (reporters).
Ta rîu nî kûrî mûirîtu ûmwe ûûnganagîria ngatheeti îmwe ya Amerika moohoro îîtagwo AI Monitor, naake eetagwo Shelley Kittleson. Kahiinda-inî gaaka akoretwo akîûngania moohoro bûrûri-inî wa Iraq.
Nî kûrî gîkuundi gîkoretwo gîgîtûma ribooti cia hahû, gîgatûma ûndû ribooti îyo îgûkinyîra thirikaari ya Amerika. Na toondû wa ûguo, thirikaari ya Amerika nî îrakinyîirie mûirîtu ûcio ribooti îyo, îgakîmwîra atî aikara Iraq amenye nî kwîiga egûkorwo akîiga mûtino-inî.
Nayo wabici nene ya Amerika (US Embassy) mûciî-inî mûnene wa Iraq, nîguo Baghdad, nî îtarîîte andû a Amerika arîa marî Iraq moime kuo, o na kaba macooke Amerika.
Kittleson Kûnyiitwo Mîgwate Mûthenya Barigici
Ûhoro wa kûmakania nî atî, Kittleson aranyiitirwo mîgwate thikû ithatû thiru mûthenya barigici, Baghdad gatagatî. Kûratuîka nî ûhûthû akorwo aranyiitirwo mîgwate nî gîkuundi kîmwe gîkoragwo kîrî mwena wa Iran maûndû-inî ma kîûteti, kîmwe kîa iria ikoragwo ciîhithîte mabûrûri maangî.
Nî kûrî na mûkwa wa biindiû ûroonania ûrîa Kittleson aranyiitirwo mateka, na no gûkorwo nî kuuma kamera-inî iria ikoragwo matuka-inî mîciî-inî mînene.
Hîndî îrîa araingîragio ngaari-inî kîa hinya, nî kûroonekaga andû maraahîtûka na makarigwo nîkîî kîrathiî na mbere. O na nî harooneka ngaari ingî igîrî ciî hakuhî cia raangi ûmwe, ihaana ta arîa me thîinî mareenda kwona ûrîa hegûthiî. Rîu mûndû ndaangîmenya kana maraarî hamwe na anake eerî arîa marahobanîirie Kittleson, kana maraarî eehîtûkîri.
Biindiû-inî îyo, nîharooneka atî Kittleson arathiagîra haandû hateehithîîte; raini-inî ya matuka mahiingûre, hakuhî na bara ngaari iraathiî o kawainda. Na kûrooneka kûrî kûhooreru gûtarî na mûtitimûko wa andû kana mûhatîkano wa ngaari.
Kambûni ya ngatheti ya AI Monitor nî moorîtie arîa maraanyiitire Kittleson mateka mamûrekererie.