Abdirashid Ismail Saidi e na ciira wa kûrûûgia Amerika ndoora mirioni ikûmi na îmwe ($11 million).
Mûthuuri ûyû wa mîaka mîroongo îtaano (50 yrs), kûratuîka aagîrîirwo nî gwîkinyia igooti-inî mûciî-inî wa Minnesota kiumia kîu kîraathirire, no ndaigana gûthiî mûtheenya ûrîa arataanyîtwo. O na rîu ndoonekanîîte.
Mûnene wa Waatho kûu Minnesota (Attorney General), nîwe Keith Ellison, nîaraiguire ûûru mûno, aaririkana atî mwena wa thitaango nî wahoete igoti rîtikaarekererie Saidi. Mooigîte atî, Saidi nî raithi kûûra toondû e na gwa gûthiî. Magîkîîra igooti atî Saidi nîarî mûtumia na mwana bûrûri-inî wa Kenya.
Ciira wa Saidi nî wa Kîî?
Saidi akoreetwo na ciira wa kwoya mbeeca cia kûrîhîra arwaru mabataro mwanya mwanya, ta ndaawa na ûtuungata ûrîa ûheagwo andû matareehota, atekûheana ûteithio ûcio. Andû kîûmbe kana marî a ikuundi mwanya mwanya nî maheagwo mbeeca ici, na maciîtagia irî mûbaango-inî wîîtagwo “medicaid”.
Saidi akoreetwo akîiyûria boomu kuuma kirinîki mwanya mwanya aandîkithîîtie, na akabaanga ûrîa arîîkagîrîrwo irore nî aruti a wîîra aake.
Aarekereirio atîa Rîrîa Aathitangirwo?
Kûrooneka ta Saidi aroreete mawatho ma Amerika weega, akoona haandû angîmonyokera.
Mûthenya ûrîa agwetagîrwo hîîndi ya gûcooka igooti-inî getha ciira waanjie, aaheirwo maûndû meerî athuure ûmwe.
Ûmwe, aneengere igooti mboondi ya ndoora ngiri mîroongo îtaano ($50,000), na acooke arîtigîre kîbaandî gîa kîîmabûrûri (passport).
Ûrîa ûngî, aneengere igooti mboondi ya ndoora ngiri igana rîa mîroongo îtaano ($150,000), naake ndagaatige “passport”.
O ro rîmwe Saidi agîcaagûra kûrîha mboondi îyo nene. Na akîinûka na “passport” yaake îî moondo.
Hau rîu, njaanji ûrîa ûraarî aciirithie ciira ûyû igooti-inî rîa Hennepin County Court nîaroonire hatirî na mwîhoko, no ndaanakiuga ûguo.
No gûkiuga arakiugire atî hatikîrî ûndû ûngîîkwo ndagîka îno, no Saidi nîatee mboondi yaake ya $150,000.
No andû nî mareeka mathabu makariingithania mboondi îyo araateire, na ndoora mirioni ikûmi na îmwe ($11 million) iria athitaangîirwo, makoona ta arî hinya agîîcokia igooti-inî.
Tiga nî atî, guoko gwa thirikaari o harîa yaarûma nî kûraihu. Kwoguo kana eehithîîte o kûu Amerika, kana Canada tondû îrigainie na Amerika, kana aroombûkire araakora mûtumia waake na mwana Kenya, egûikara ûtûûro wa “ûra kana ûmarwo”.
Na hiihi magooti ma Minnesota nî meekûmoomia matua maao, mûno mûno harî andû a gûûka, nî gwîtigîra mûthiitangwo ndakoore ta Saidi, arege gûcooka gûciira.