Kîrîma kîmwe kîraatuthûkire mwaki wa “lava” ira rûciinî, na andû atatû maraakua hau hau.
“Lava” nî gîcûrûcûrû kîa mahiga, gîtuthûkaga kuuma biiti nyiingî na kûu thîinî wa kîrîma, mahiga maaringûrwo nî ûrugarî wa igûrû mûno.
Kîrîma Kîu Nî Gîa Kû?
Kîrîma kîu kîraatuthûkire “lava” kîrî bûrûri-inî wa Indonesia, na gîîtagwo Mount Dukono.
Indonesia nî gîcigîrîra kîrigainie na Malaysia, na mabûrûri maya meerî marî mwena wa kîanda wa Asia ya itherero.
Kûrathiire Atîa Mûtino Ûkîoneka?
Nî kûraariga ûrîa kûraakorirwo na andû kîrîma-inî kîu kîa Dukono. Gîtûmi nî toondû ataaramu a maûndû meegiî mahiga na tîîri nî makoreetwo makiuga atî kîrîma kîu no gîtuthûke ihiinda o rîothe.
Andû acio atatû maraakuire maraceeraga o gwîkenia kîrîma-inî kîu (hiking), marî gîkuundi kîa andû mîroongo îîrî (20).
Amwe aao maraarî a kûu Indonesia, na arîa angî maraarî a kuuma bûrûri wa Singapore.
Gûtiraamenyeka kana ageni arîa maraarî hau matinoona mûûndû wa kûmahe ûtheri wîîgiî kîrîma kîu kana nî atîa.
Tondû o na ataaramu magîkaananagia kûhaica kîrîma kîu ihiinda-inî rîîrî rî, no gûkoreetwo na ûira mûiganu kuonania kîrîma kîu kîrî na ûgwati wî hakuhî mûno.
Kuuma mweri-inî wa gatatû (March) mwaka ûyû, gîtuthûkîîte “lava” maita ta magana meerî (200).
Nî ûhoro wî kîeha mûno, toondû kûratuîka atî andû acio maraakuîrîire mûripuko-inî ûcio maraarî na mîaki ya gûthoondeka tûrûgano na mbica cia gûkenia andû ng’enda-inî. Na njîra îngî, marathoondekaga “content”. Kwoguo ti ta mûrûûgamîrîri wa kaambûni ya “Air Canada” ûrîa wahîtirie ateekûmenya mweri-inî wa gatatû (March) mwaka ûyû.