Mûnini wa Donald Trump wa Amerika nî akirîîte mûno ûhoro ûkoniî mbaara îrîa îraathiî na mbere ya Iran. Kuuma Amerika na Israeli meekîrana mîaki atî matharîkîre Iran rî, JD Vance ndarî aheana mawooni maake. O na hîîndî eerîga kûûrio ciûria nî aandîki a mohoro, aaheanire macookio na njîra ya ithiûrûrî, ateekwenda kwonania harîa arûûgamîire.
Ûndû ûyû ûreekîra andû aingî ciûria toondû we Vance ti mûûndû wa gûkira Trump ekîîte ûndû mûnene ta ûyû. Ta hîndî îrîa President Trump eerîga gwathana mûtoongoria wa Venezuela ûrîa wîtagwo Nicolas Maduro anyiitwo kuuma o bûrûri-inî waake, Vance nî aahiûhire gûkûûngûîra ûhoro ûcio. O na matiathirire mathaa maingî atathiîte mûtandao-inî wa X, kuuga ûrîa Trump e na kîhooto gîa kûnyiitithia Maduro.
Ûndû ûngî ûraagegia andû nî kaûndû kaangî Vance oigire agîcookeria andû a “media” ciûria. Thuutha wa kûmeera atî to mûhaka mûûndû ahithûrie ndeereti ciao na mûnene wa bûrûri rî, acookire akîongerera atî ndeekwenda “gwîkora njeera”. Hau andû magakîrigwo atî, kaî ndeereti yathiangire atîa Trump amwîîra nîareenda kûhithûkîra Iran?