Kûrî mûthenya wa Kana kiumia gîîkî, ing’oora ciarîrîîte kûrîra kûûrîa mûciî mûnene wa Israeli, Tel Aviv. Ndoogo njirû nayo îgakîiyûra igûrû rîera-inî, kuumanagia na mîripuko yaatuthûrîtwo nî matharaita maikîtio kuuma Iran.
Nacio icigo iria ithiûrûrûkîirie kîwaanja kînene kîa ndege kîa Ben Gurion igakînuunga o ndoogo. No weega nî atî, gûtihaana ta kûrî andû maraumiire tharîkîra-inî îyo.
Mûciî wa Tel Aviv wî hûgûrûrû-inî cia iriia rîa Mediterranean, na nî wa bata mûno harî Israeli kîîbiacara, na harî kûnyiitithania mîthiîre na mabûrûri ma kûraaya.
Mbunge ya Amerika Kûremwo nî Kûgiria Trump atwarithie Mbaara ûrîa Ekwenda
Kûrî mûthenya wa ira, mûswanda wa kûgiria Donald Trump atwarithie mbaara îno ya Iran ûrîa ekwenda na mûtwe waake, ûrîa ûraciiragîrwo “Congress”, nî ûrahootirwo.
Kîama kîa Democrat nîkîo kîreendaga mûswanda ûciinde, no moumîrîra maraarî 219:212. Ameemba a kîama kîa Republican marakînyiita Trump mbaru, arî ûmwe waao.
Iran ndîrî îrahûûmûka gûikia makombora mîena na mîena
Iran îtûmîîte Israeli ndîkaagîe na hiihîrio, tondû andû aake maratiinda macûûthîîrîirie kûrîa makombora ma kuuma Tehran, mûciî mûnene wa Iran, mathimîîte. Magakîrekereria matharaita ma kwanaanga makombora macio, kana “interceptors”.
Ûguo nîguo kûraatindire Tel Aviv ira, na o na gûtuîka gûtiîrîtwo ûhoro wa andû kûumia rî, indo ta mîako ûguo cio nî nyanaange.
Trump eehaarîirie Gûthigithania Iran Biû
President wa Amerika araigua ûûru mûno, tondû andû a Iran nîmaregeete gûûkîrîra thirikaari yao. Eeciraagia atî toondû nîmeerîga kûandamana nîûndû wa indo kûgîa goro na maûndû kûritûha, atî nîmeegûkenerera kamweke ga kûgûithia thirikaari ya President Mahmoud Pezeshkian.
Ûndû ûngî ûngîkorwo nî ûmûmboete, nî gûkorwo atî o na mooraga atoongoria aingî anene a thirikaari na jeshi mbaara îno îkîambîrîria, mbûtû ya IRG, nîyo “Islamic Revolutionary Guard”, îthiîte na mbere kûrûûgamîrîra bûrûri na mûtaratara wa magegania.
Rîu toondû me na mûtongoria wa Israeli, Benjamin Netanyahu, nîmoneete atî kweri mwîîro wa ngoro ndûkinyaga rî, mareenda rîu kûguucîrîria andû kabira ya Akundi (Kurds), tondû matiiguithanagia na Iran.
Maamaguucîrîria mamoongerere matharaita harî marîa makoragwo namo. Macooke mamateithîrîrie kûingîra Iran makaanjie thogothogo kûu.
Andû aya a Akundi nî aingî kûrî mirioni 30 thî yoothe, na matirî bûrûri wao o eene. Kûrîa makoragwo kwa ûingî, makoragwo makîgiana mûno na thirikaari cia mabûrûri macio. Thogothogo imakoniî nî ciiguîkaga mabûrûri ta Syria, Turkey, Iran, na Iraq. No matukû maya matiraagiana mûno na Iraq, tondû Iraq nîyaamaheire icigo ciao matwarithagie maûndû maao ûrîa mekwenda.
Akundi arîa makuhîrîirie Iran maikaraga mûhaka-inî wa Iran na Iraq, nao matûûraga na thogothogo na thirikaari ya Iran.
Iran ndîkomeire matû
Amerika na Israeli magîciiria macoreire Iran mûno, Iran yamoneire o haraaya. Kiumia gîîkî Iran îkoretwo îgîikîria Akundi makombora icigo iria maikaraga, mûno mûno irîma-inî ciî mûhaka-inî wa Iran na Iraq. Icaikuhî ningî, îraariinga na njîra nene mûno mûciî wî gîcigo-inî kîa Akundi wîtagwo Sulaimaniyah.
Kûrî mûthenya wa ira, Iran îreerire aandîki a mohoro atî îhûthîrîîte matharaita ma ndirûûni mîroongo îtatû (30), kûgûtha icigo mwanya mwanya kûrîa Akundi marî. Atî Iran îgacooka îkagûtha gîikaro kîao kînene biû, kana “headquarter”, na matharaita ma mûtheemba wa “missile”, ithatû.
Rîu thî yoothe no Kwîrorera îîroreire
Gûtirî mûndû ûûî ûteithio wa Akundi kana nî gûkuhîhia ûgûkuhîhia mbaara îno, kana nî kûraihia, kwoguo rîu mabûrûri maangî no kwîrorera na gweterera. No Iran îreeterera o îkîgeragia kûhotomia hinya wa Akundi.
Kurî mûthenya wa gatatû kiumia gîîkî, aandîki a mohoro mahûûrire mbica kîwaanja kîa ndege kîa Erbil, kîrî gîcigo-inî kîa Akundi bûrûri-inî wa Iraq. Mbica ciarî cia haandû haarî na thegethege wa nyûûmba nene ndirûûni ya Iran yagûthîîte îkamomora. Îîria îyo Akundi nî ta meyaathaga, na îtagwo Ankara.