Kûrî mûndû ûmwe wa Amerika wakuîrîire njeera mwaka-inî wa 2019, agîtigîra andû angî thîîna. Mûndû ûcio eetagwo Jeffrey Epstein.
Tene tene aarî mwarimû cukuru yeetagwo Dalton yathoomagîrwo nî ciana cia itoonga. No nîacookire akîbuutwo tondû o na ndaathomeire waarimû. Agîthiî kwandîkwo beengi yeetagwo Bear Stearns. Wîîra ûcio wa beengi aacarîirio nî mûciari ûmwe wa cukuru ya Dalton rîrîa abuutirwo.
Hiihi nîûndû wa gûkuruhana na itoonga na ciana ciacio cukuru-inî wa Dalton, Epstein nîerirîirie mûno gûikara mûtûûrîre wa itoonga. Agakîgeria mûno hîndî îyo aarî beengi gûtuma ndûgû na itoonga.
Epstein Kûhîîngîca Itoonga
Epstein oonire nî kûrî njîra angîhûthîra eyongerere arata aingî atoongu na me gatû, nayo nî njîra ya kûmatega na tûirîîtu tûniini. Agîkîoyana na mûirîtu ûmwe, mwarî wa gîtoonga kîmwe Ngeretha gîetagwo Robert Maxwell. Mûirîtu ûcio eetagwo Ghislaine Maxwell.
Epstein aatûmaga mûirîtu ûcio, o na gûtuîka eerî maarî na ndûgû ya kîîwendo, athiî mataûni-inî na mîtaa-inî, akaguucîrîrie tûirîtu tûniini na gûtwîîrîra mûtûûrîre mwega tûirîtu tûu tûtarî twona. Aatûtwaarîra Epstein, naake agagîtûhe mbeeca nyiingî tûkagagaya. Tûmwe o na nî twaheagwo mbeeca cia kûguucîrîria tûûngî thukuru-inî ciao.
Epstein agagîthûûkûma na tûirîtu tûûtû kûrî athuuri arîa araata aake itoonga. Na ûyû nî ûndû wa gwîthithimûkwo, kûmenya atî tûirîtu tûingî twarî thî ya mîaka 18, na tûmwe o na twaarî twa 14; kûriingana na ûrîa igooti rîacookire kwîrwo hîîndî ya thitaango.
Epstein acookaga akahakikica na waara atî itoonga ici nî ciahûûrwo mbica na tûirîîtu tûu, agakîmenya aangîkanyiitwo, ndakaagwa arî wiiki.
Nî Andû aingî Me Thîîna-inî Rîu. Thikû cia Mûici nî Mîroongo Îna.
Epstein nîatûûra mîaka mîroongo ta gîtoonga. Aagûrîîte gîcigîrîra gîake (private island), meli ya maandaraka ya mûtheemba wa “yacht”, na ndege yake we mwene nene (private jet) ya kûûmbûkaga nayo. Niingî nî aakuuaga itoonga arata aake na ndege îyo na thiri, kuuma mataûni-inî maao nginya gîcigîrîra-inî gîake kîrîa gîakoragwo na tuirîîtu hiingo ciothe.
Rîu rekoondi iria aigaga cia mbica na marûa nî irîkîîtie kûnyiitwo nî borithi cia Amerika cia FBI.
No gûtirî kûûndû gûtarî uungumania toondû, ona toondû Epstein aananga ciana ciene mîaka îkîrîîte 30, nî athitaangîtwo mwaka-inî wa 2008, no kîoho gîake kîarî kîa mîeri o 13, na nî ta kîarî kîa nja. Nî ta aatiindaga gwake waabici agathiaga njeera ya Florida o kûhûûra ribooti.
Kwoguo ihera rîa biû rîarî rîa kûrîha mbeeca tûirîîtu tûrîa twatûmire athitaangwo hîîndî îyo, na aakîrî na itoonga cia kûmûteithîrîria.
No nî gwagîkinyire haandû airîtu arîa aahahamîîte marî aniini, na nî maanenehire, moonire nîmeekwaaria.
Epstein agîgîtwarwo igooti-inî nî mawakiri akaru mwaka-inî wa 2019 mweri-inî wa mûgwanja. Na mweeri-inî ûyû ûngî, agîkuîra njeera. Andû o na meerwo atî araakorirwo eitîîte, matietîkirie. Monire no anga arooragîirwo njeera ndakoimbûre andû a bata arîa maahûthagîra tûirîtu ûûru naake.
Rekoondi cia Epstein iraanîrîrwo o tûniini o tûniini.
Harî andû arîa makinyîîtio magooti-inî nîûndû wa ûira wa kuuma rekoondi-inî icio cia Epstein nî mûriû wa mûtumia wîîrîga kûhuurûka, Kwiini wa Ngeretha, “Queen Elizabeth”. Mûriû ûyû atûûrîîte oîkaine ta Prince Andrew. “Queen Elizabeth” noowe nyina wa ûrîa weetagwo Prince Charles, na rîu nîwe mûthamaki Ngeretha: “King Charles”.
“Queen” ataanakua nîamenyeete ndeto ici cia Andrew gûkuruhanio na Epstein, na akîruta mûriû ndebe ya gwîtwo “His Royal Highness”. Ningî akîmwehereria mawîîra marîa aheetwo ta ûmwe wa mûciî wa ûthamaki (Royal family). Eekire ûûguo akîgeria kûhuumbîra thoni nyûûmba îyo, na ûthamaki guo mwene (monarchy).
Na o ro rîu kîambîrîria kîa mwaka ûyû, karûûndo kaangî ka bairo cia Epstein (Epstein files) nî karaarekereirio nî miniistrî ya waatho. Kûroonania niingî atî Andrew Mountbatten, mûrû-a-nyina na King’i, e na mahîtia maangî makoniî Epstein.
Maya rîu ti ma airîîtu. Nî gwîkûûo arekûûo atî no akorwo aaheire Epstein thiri cia bûrûri wa Ngeretha. Njiriiri ici iroimanire na marûa maroonekire, Epstein akîîra Andrew atî no eende amwonithanie na ûrîa waarî mûnene wa bûrûri wa Libya, Muammar Gaddafi, mahûûre biacara.
Kamûira borithi ya Ngeretha înyiitîîte Andrew kûmûhûûnga mahûri rî, “King Charles” nî arakoreetwo aamûtuunya ndebe ya gwîtwo “Prince”, na akamwîra athaame nyûûmba îrîa araikaraga, tondû nî ya gûikarwo nî andû arîa me na ndebe cia ûthamaki.
Charles ndeekire ûguo na ûûru. Nî wîîra waake ta mûthamaki kûgitîra rîîtwa rîa ûthamaki. Nîkîo o na nîaheire Andrew nyûûmba îmwe yaake kîûmbe îtahuutanîtie na ûthamaki, aikare agîkabaanga kûrîa arîikaraga.
Princess Beatrice na Princess Eugenie Kûhinyîrîrîka
Andû arîa mûûndû aangîiguîra tha biû nî ciana cia Andrew, Princess Beatrice na Princess Eugenie. Nî makoreetwo mahiinyîrîirio mûno nî mûhuuhu na ndeto nyiingî ikoniî ithe. O na kûrî mweri wa “December”, meetirwo nî mûtumia wa Prince William, Princess Catherine, marîanîre thigûkû ya 25 na andû arîa angî a nyûûmba ya ûthamaki, magîcookia ngatho no makiuga matiikûhoota.
Kwoguo Epstein nîatigîire andû aingî thîîna, na o mûûndû arakuuithio mûrigo waake e wiiki o hîîndî yaake. Na mûndû ta Andrew, mûrigo waake ûkahiinyîrîria nginya ciana ciake.