Mûtungatîri wa kanitha wa PCEA ûrîa ûratuungataga PCEA Thika Town Church agaathikwo mûthenya wa Keerî kiumia gîîkî kîrooka.
Rev. Daniel Kamau Ndîritû aakuire mûthenya wa Kiumia, 10/05/26. Ribooti itarî njîkîre mûkoonde kuuma kûrî Akristiano a PCEA, îroiga atî Rev. Daniel Ndîritû nîarathîînagio nî mûrimû wa meciiria wa “depression”. Atî na nîguo ûratûmire akue.
Mahooya ma Macakaya
Ûmûûthî nî kûrî na gîthoomo gîa kûririkana mûtuungatîri Kamau Ndîritû. Na gîgûkorwo kanitha-inî wa PCEA Thîka, thaa Kenda (3p.m.).
Mahooya ma macakaya maanjirie o mûthenya wa Gatatû, 13th May. Makoretwo magîthiî na mbere kanitha-inî wa PCEA Thika Town, kûrîa Rev. Kamau Ndîritû araarutaga wîîra atanahuurûka.
Kûrîa kûûngî gûkoreetwo na mahooya ta macio nî mûciî kûrîa baamîrî ya mûtuungatîri îikaraga. Nîkuo Kiu Kenda, Kîambu.
Baamîrî ya Mûtuungatîri
Rev. Kamau Ndîritû araarî mwana wa William Ndîritû Mbûgua na Milka Njeri Ndîritû.
Araarî mûthuuri wa Edith Wanja, na ithe wa ciana inya, nîcio Yvonne, Willies, Fadhili na Ivanna.
Maraciaranîirwo na Wilson Mwai, Gladys Wambui Mwangi, Naomi Muthoni Maigua, Ayub Wang’ondu, na Mercy Ndiritu.
Mathiko ma Rev. Kamau Ndîritû
Mathiko ma Rev. Kamau Ndîritû nî ma oke, mûthenya wa Keerî. Gîthoomo kîa mathiko gîgaakorwo kanitha-inî wa PCEA Kagonye kuuma thaa inya (10 a.m.)
Thuutha-inî mwîrî ûgathiî gûthikwo mûciî-inî kwa Rev. Kamau Ndîritû. Nîkuo Kagonye, Mahiga location, Othaya, Kaûntî ya Nyîrî.
Njuumatatû ya kiumia kîu kîraathirire, nîguo Reverend Ngarî Ndumia aathikirwo. No gûtirî kûraamenyeka andû arîa mamûûragire. Borithi no irathiî na mbere gwîka ûthuthuuria.
Mahooya maitû no Ngai aige maroho ma nduungata ici ciake haandû heega matu-inî.