Thirikaari ya Israeli îraanîrîire atî nî îrîkîîtie kûûraga abithaa mûnene wa maûndû ma iria-nî wa Iran, Alireza Tangsiri. Na îroiga atî ûcio “navy chief” marakuire hamwe na abithaa ûngî wa “navy”, ûrîa ûratoongoragia maûndû megiî ûthuthuuria wa ndeto kana “intelligence”. Ûcio areetagwo Behnam Rezaei. Yo Iran ndiugîîte ûndû ûkoniî ribooti îyo.
Maabithaa acio kûratuîka maragûthîirwo nî makomboora ma Israeli nyûûmba-inî îmwe ya ûgitîri (safe house) ya jeshi, mûciî-inî wa Bandar Abbas bûrûri-inî wa Iran.
Ikuû icio Iroimire Kûhiingwo kwa Hormuz
Kûraatuîka Tangsiri na Rezaei mûno mûno marooragirwo nîûndû wa kûrûûgamîrîra kûhingwo gwa gacîra ka maaî-inî ka Hormuz. O na Iran yahiinga gacîra kau kageragwo nî meeri cia maguta, nî îreetîkîria mabûrûri marîa îkwenda mahîtûke. No ta rîu gûtirî maguta ma Amerika kana mabûrûri ma Gulf maangîgererio hau. Iran ndîngîîtîkîra.
Ûcio nîguo ûndû mûnene ûtûmîîte maguta mahaice thogora thoko-inî. Maguta ma kweendio manyiiha, nayo mbei îgakîhaica.
Kûratuîka atî rîrîa maica marî ma kawainda, gacîra kau ka Hormuz nî kahîtûkagîrio maguta ma ndoora îkîrîîte mbirioni îmwe na haniini o mûthenya. Ûguo nî ta kuuga mbaara îngîthianga ûguo îraathiî, biacara îrîa îkûûra thoko-inî ya maguta nî ya matiririoni ma ndoora.
Israeli na Amerika Matireenda Kûûraga Spika wa Mbuunge
Benjamin Netanyahu wa Israeli me na Donald Trump wa Amerika, makoretwo meerûmîire iromo atoongoria oothe a Iran.
Makoreetwo magîcarania na mûûndû woothe ûrî uuge kwa jeshi, ndini-inî, mbunge-inî, na guothe thirikaari-inî, nîguo mooragwo. Makoona atî meeka ûguo nî gûûgûkorwo arî raithi kûgarûra thirikaari.
Kwoguo o na Spika Mohammad Bagher Ghalibaf akoreetwo raini-inî îyo ya maabithaa a kûûragwo na ihenya o ûrîa kûûngîhoteka. No rîu jeshi ya Israeli îroigire nî îreeheririe rîtwa rîake hau, hamwe na rîa Minista wa Maûndû ma na nja, Abbas Araghchi.
Kûraatuîka atî nî Pakistani îraarutire mataaro atî acio eerî matige kûûragwo. Mareera Amerika na Isiraeli atî maabithaa acio no mamateithie mûno harî ndeereti cia kûiguthania na Iran, ûhoro ûkoniî gûtiga mbaara.
Thirikaari ya Pakistani nî yeerutîire matukû maigana ûna mathiru, kûgeria gûtoongoria ndereti gatagatî ka Amerika na Iran.
Andû nî maroona nî weega mbaara îno îthire, no magacooka makarigwo kana ndeereti ici nî igûkorwo na uumithio. Wa mbere, Pakistani îkoreetwo thogothogo-inî na bûrûri wa Afghanistan. Na meerwo maaranîriî haaro îthire, Pakistani îkarega.
O na kiumia gîthiru, kûrî mweri 16 wa gatatû, Pakistani yaikîirie Afghanistani komboora, îkîûraga andû aingî mwako-inî ûngî ûkooragwo ûgîteithîrio andû arîa maraahona kuuma ûhûthîri-inî wa ndawa cia kûreebia (rehabilitation center).