Andû ana nîmaratûmwo kwa mweri ûmûûthî kûûrîa Amerika. Harî na arûme eerî na mûtumia ûmwe marutaga wîîra na kaambûni ya NASA, na mûndû mûrûme ûngî ûrutaga wîîra na kaambûni ya CSA. Kahiinda-inî gaaka marî mûcii-inî wa Florida meetereire kûûmbuka na “ndege” yaao ya mwanya.
Kaambûni cia NASA na CSA ciîhang’agia na maûndû ta maya ma gûceera rîera-inî kûrîa andû mataikaraga, makîgeria gûthooma ûhoro wakuo; NASA îgagîkorwo îrî ya Amerika, nayo CSA îrî ya bûrûri wa Kananda.
Marîtwa ma Andû arîa Maraathiî Kwa Mweri Ûmûûthî
“Ndege” îrîa îraahûthûrwo riita rîîrî gûthiî kwa mweri (spacecraft) îreetwo Artemis II (Artemis Two).
Andû arîa ana îgûkuua nî Reid Wiseman, ûrîa arî we ûratoongoria thabaarî îno; Victor Glover, arî we nyeuthi ya mbere gûthiî kwa mweri; Christina Koch, ûrîa ûgûkorwo arî mûtumia wa mbere gûthiî kwa mweri; na Jeremy Hansen.
Wiseman, Glover na Koch nî a kaambûni ya NASA, naake Hansen nî wa kuuma kaambûni-inî ya CSA.
Iceera Rîîrî rîa Artemis II Nî Rîa Kî?
Wa mbere, ûrîa thabaarî îno îbangîîtwo, nî îgûthiî kiroomita nyiingî kûrî iria cianathiio nî micooni ingî cia kwa mweri.
Na niingî andû aya maraathiî matireendwo makoima nja. Megûikara o thîinî wa “ndege” îno yaao ya Artemis II, mathoome maûndû marîa megûthooma marî o thîinî. Gwa kahiinda ga thikû ikûmi (10 days) karîa Artemis II îbangîirwo gûikara igûrû, îgûkorwo îgîthiûrûrûka o kûu ûguo mweeri-inî, îtekûrûgama kana “kûgûa” haandû.
Mûno mûno kûreendwo andû aya meiguîre ûrîa mwakîre wa ndege îno ûraiga andû rîrîa me thîinî, na kwanja harî mîhiihîrie. Ûyû nî ûndû wa bata toondû na kûûrîa igûrû matu-inî gûtirî rîera rîega rîa kûhiihia ta rîrîa rîhiihagio gûûkû thî.
Gîthoomo kîrîa andû aya ana megûthooma thabaarî-inî îno, na ûmenyo ûrîa megûcooka naguo, nî maûndû megûteithia micooni iria ingî iikûrûmîrîra, kwanja iria igûkorwo ibaangîirwo atî “ndege” îgwe andû moime mathoome maûndû me nja.
Ûmenyo waao nî ûgûteithia kaambûni ta NASA macooka, kûmenya nî ha heekwendwo haceenjio ndege-inî, mûbaango-inî wa thabaarî, na maûndû-inî ta macio.