Kambûni ya Crown Paints nî îhingîîte kambûni îmwe yaayo Kenya. Ûguo nî ta kuuga nî kûrî andû mateete mawîîra.
Ino kambûni îthoondekaga maraangi mwanya mwanya na îkameendia. Maingî nî ma kûhaka nyûûmba; thiingo-inî na mabaati-inî.
No mîaka-inî ya haaha thuutha, kambûni îno nî îkoreetwo îgîthoondeka maraangi ma kûhûthîrwo na njîra ingî. Nginya maangî mahûthagîrwo marî siiranti (sealants).
Crown Paints Kûhiinga Crown Paints Allied Industries, Kenya
Kambûni îno nî îkoragwo yûûmbîîte kambûni ingî niinaniini cia gûtheeremia wîîra wayo. No rîu ndeto iria irî igûrû nî ûrîa kambûni îno îrîkîîtie kûhiinga kambûni ya Crown Paints Allied Industries ya gûûkû Kenya.
Andû nî marigîîtwo nî gîtûmi gîa Crown Paints, kambûni îkoreetwo Kenya mîaka mîingî, îkorwo îkîhiinga kambûni îyo, na kahiinda-inî o ro kau nî îraathiî gwaka igaanda cia maraangi bûrûri-inî tûrigainie wa Tanzania.
Yo Crown Paints nî yeeretheete atî ndîroima Kenya îrî yoothe. Atî no kambûnî îrîa yaayo niinaniini îrahiinga.
Mathabu ma Kambûni îno ya Kenya ya Maraangi
Mwaka-inî wa 2016, arori a mathabu, nîo “auditors”, nî moonire atî kambûni cia njiarîrîra (subsidiary companies) cia Crown Paints kûndû na kûndû ciahiingaga mwaka na haathara handû ha baita. Na makîîra Crown Paints atî maûndû mataceenjie, “subsidiary” icio ciao ciahota gûtûma kambûni yoothe ya Crown Paints îgwe.
No Crown Paints nî yaarî na mwîhoko na ucuumi na rîera rîa ûigithia Kenya. Na kwoguo nî yathiire na mbere gûtheeremia mawîîra ma kambûni ya Crown Paints Allied Industries ya Kenya.
Na njîra nguhî, ndîendire kûmîhiinga. No rîu nî ta gûkinyîîte haandû îkoona hiihi ta biacara yaayo îkûhîa.
Crown Paints Kûigithia Tanzania na Njîra Nene.
O na harî o ûguo, andû matiagîîte kuona kûrîa Crown Paints îraikia mamirioni ma mbeeca o na îkîhiingaga kambûni yaayo Kenya.
Crown Paints îraikirie kîgîîna kîa hakuhî mirioni magana manaana (almost Ksh.800 million) kambûni-inî yaayo ya Tanzania. Na nî kambûni îreendagia gûte o ta ya Kenya.
Nî kûrooneka ta Crown Paints îreehoka rîera rîa biacara rîa Tanzania kûrî rîa Kenya. Gîtûmi nî toondû, to kwongerera yongereire Crown Paints ya Tanzania kapito (capital) ya gûthoondeka na kwaramia wîîra. Îcokeete îkabaanga ûrîa îkwanjia ûigithia mwerû kûu.
Mûbaango ûrîa wî ho nî Crown Paints yaake kîgaanda kîa raangi mûciî-inî wa Dar-es-salaam, Tanzania, na thitoo nene biû, nîyo “depot”, mûciî-inî wa Dodoma.
Mîbaango îyo ya Crown Paints îribootetwo na njîra îronania nî mîkinyanîru. Kwoguo, Kenya îkûiganîra o ûguo, îiganîre na ûigithia wa Crown Paints Kenya PLC. Mwîhoko nî atî aruti a wîîra a kambûni îno ya Likoni Road, Nairobi, na a kîganda gîa Gîthumo, nîmegûthiî na mbere na mawîîra maao o ta tene.