Pete Hegseth nîwe Minista wa Mbaara kûûrîa Amerika. Ministrî ya Mbaara mîaka yoothe îkoreetwo îgîîtwo Ministrî ya Ûgitîri kana “Defense”, nginya hîîndî îrîa Raisi wa Amerika, Donald Trump, eerîga kûmîceenjia rîîtwa.
Minista Hegseth abuutire abithaa ûmwe wa wabici yaake mweri wa kana mwaka mûthiru, ûrîa wakoragwo e mûmûtaari mûnene (senior advisor) kîîwîîra. Abithaa ûcio wîîtagwo Dan Caldwell aarutagîra wîîra wabici-inî cia Pentagon, na nîkuo Hegseth oigire arutûrûrwo oimio nja ya kîhiingo, ûndû waarî ta wa kûmûconorithia.
Mahîtia ma Caldwell Maarî Marîkû?
Hegseth akiuga, Caldwell na maabithaa angî eerî o a Pentagon nî moimagia thiri cia waabici ciao nja.
Pentagon nîkuo mawabici manene ma ûgitîri wa bûrûri wa Amerika marî, na kwoguo ti ûndû mûhûthû kûigua atî nî kûrî andû maroimia thiri ciakuo nja. Kwoguo ûthuthuuria nî weekirwo o ro na ihenya. Ûthuthuuria woonanirie atî hatiarî na kaûira o na kaniini, ga kuonania atî Caldwell kana maabithaa acio angî eerî nîmoimagia thiri nja.
Caldwell Gûcookio Wîîra
Dan Caldwell, ûrîa waanakorwo arî jeshi na nginya agatûmwo mbaara-inî Iraq, rîu nî mûcookie wîra gwa thirikaari. Ûhoro wa magegania nî atî, aheetwo gîturwa kîerû gîîgûtûma o na akuhîrîrie waabici nenanene.
Rîu eehokeirwo wîîra wa gûtaaraga anene a ûgitîri, akameeraga nî maûndû marîkû na marîkû maagîrîirwo nî kwîrwo mûnene wa bûrûri, Trump, o rûcii-inî o rûcii-inî. Nî ta kuuga mawooni maake marîkoragwo marî na ûritû mûnene ma, harî “daily briefings” cia President.
Caldwell kûheeo gîturwa gîîkî nî kûraatûma mûndû eyûûrie kana
President Trump no aigîîte Minista waake, Hegseth, harîa aramûigîîte. Na mûno mûno mûndû eeciiria ûrîa mbaara îno îî kuo ya Iran îratwarithio na tûmathogothanio twî ho.
Gîtûmi kîa ma Gîatûmire Hegseth Maremanwo na Caldwell
Atanacookio wîîra, Caldwell nîagîire na kamweke ga kwaria na mûmemeerekia ûmwe wa moohoro wîtagwo Tuck Carlson, na akîmwîra ûrîa maatwaranaga na
Hegseth. Akîmwîra atî, harîa we ooî matiaiguithanagia, nî maûndû makoniî mabûrûri ma Gîcigo kîa Gulf na îîria îyo yoothe îîtagwo “Middle East”.
We Hegseth akoreetwo arî andû arîa makumagia Trump maûndû-inî moothe, na Trump agagîkenio nîwe. No arî Minista wa Ûgitîri, angîkorwo ndamenyaga nî kûrî hîîndî ya itherû na ya kahîîndî merûka, Trump nîegûkîbatario nî andû angî hakuhî, arîa marîhotaga kûmwîra ûhoro wa ma ûkoniî maûndû ta maya ma mbaara ya Iran.