Kûrî mûthenya wa Gataano kiumia gîîkî, Iran nî îraaikirie makomboora mûciî ûmwe kûûrîa bûrûri wa Iraq, wîîtagwo Erbil.
Makomboora macio mareerekeirio mûkaawa ûmwe mûnene ûceeragwo mûno nî ageni a kuuma rûraaya, na wîîtagwo “Erbil Arjaan wa Rotana Hotel”.
Hau kabere, Amerika nî îrakoretwo yanyiita mûhuuhu atî Iran nî îreenda gûikia matharaita Iraq, no ndîraanyiitîte ûhoro mûgima. Kwoguo waabici nene ya Amerika îrîa îrî Iraq (US Embassy) îrerîîte andû a Amerika maikaire meemenyereire. No mûno no gûkorwo mareciiragia Iran îngîenda gûtharîkîra haandû mûciî-inî mûnene wa Baghdad.
Iran Kûgunîka Maita Meerî
Iran yariinga mûkaawa ûcio wî Erbil, îragunîkire na njîra mwanya mwanya. Wa mbere, îraigwithirie ûûru na îreekîra wagaagu andû a Amerika arîa marî Iraq, na a mabûrûri marîa marî ûraata na Amerika, ta Ngeretha na Baraanja. Kwoguo rîu nî maanjie kûbaanga ûrîa megwîthara. No nao moima Iraq, mbeeca iria maraahûthagîra me Iraq nîciatiga kûguna Iraq. Ûguo nî ta kuuga, Iran îgîthîînîka kîûchuumi, o na Iraq îthîînîke, o na akorwo ikîro cia gûthîînîka itiikûiganana.
Wa keerî, mûkaawa ûcio wa Arjaan ûrî mûciî-inî wa Erbil, na nî Akundi (Kurds) maikaraga gîcigo-inî kîu. Aya nî andû Amerika îkoretwo îkîguucîrîria mamateithie mbaara-inî îno. Gîtûmi nî atî maangîtoonya Iran, no mahote kwîhithania na mahûûnge thiri cia Iran.
Thiri icio magagîtwaarîra Amerika nîguo îhote gûtharîkîra Iran weegega. No mûno kûrî ûguo, Raisi Donald Trump wa Amerika areenda ûrîa Akundi acio maangîthiî maciinîrîre raia ya Iran, nîguo yaanjie maandamano kûrî thirikaari yaao. Amerika îngîenda kuona maandamano Iran, raia îkîîra thirikaari îkinyie mbaara mûthia; yaani thirikaari ya Raisi Masoud Pezeshkian yuuge nîyaathareenda.
Iran Gûikia Komboora Nene Hakuhî na Kîhaaro Kînene kîa Ndege kîa Dubai
O Gataano o ro gaaka, Iran nî îraikirie komboora nene yeerekeirie kîhaaro kînene kîa ndege mûciî-inî wa Dubai. O na gûtuîka komboora nî rîraahîtirie haniini, mûûndû arî kîhaaro-inî kîu nîaroonaga ndoogo nyiingî njirû hakuhî. No mûno mûno komboora gûkorwo rîgwîîte hau, no gûgakenia Iran. Tondû nî ta kuuga nîyaingîria ageni arîa me Dubai heho. Nîmaamenya atî o na mîthiîre ya ndege kuuma Dubai o nayo ti ya thaayû.
Iran o Nayo no Îraaringwo
Israeli nî yoonete atî Iran ti kau, na kwoguo îkeenda kûhiûhiahiûhia mûrûîre waayo. Kûrî ûtukû wa mûthenya wa Gataano, Israeli nî yaikirie makomboora maingî mûciî-inî mûnene wa Iran, Tehran. O thuutha wa mathaa maigana ûna, komboora rîkagwa. Kwoguo andû me haraaya nî moonaga ndoogo na mîrîrîîmbûko ya mîaki rîera-inî.
No Israeli îkîriinga Tehran, nayo Iran no yariingaga Tel Aviv. O Gataano o ro kau rî, ing’oora ciarîraga ta kî Tel Aviv, nî ûndû wa ûrîa makomboora magûire. Nî ta kuuga atî, o na akorwo Iran nî îkoreetwo na ûnyiihu wa makomboora marîa mathiaga itîîna inene, no îîtigîirie ma ûtukû mûûru. Kwoguo o nakuo Israeli, nîkûmenyekeete atî mûciî ûcio mûnene, Tel Aviv, ti kweega gwa gûikarwo.
Maûndû ûrîa mathiîte, kûroonania ta mbaara îno îîgûikaikara kûrî ûrîa mûndû angîreeciiririe, na îgarûre ûrîa maûndû ma mûikarîre makoragwo mwena wa Gulf.