Mûthenya wa keerî kiumia tûrî, kwerîkanire atî kîama gîa atoongoria a ndini Iran, nî kîarîîkirie gûtua itua nûû ûgûikarîra gîtî kîa mûnene wa kîîndini wa bûrûri ûcio.
Ûrîa ûraarî gîtî-inî kîu, Ayatollah Ali Khamenei, nîerîga gûkua e wa mîaka 86. Ooragirwo mûico-inî wa kiumia gîîkî kîraahîtûkire, nî matharaita marîa makoretwo magîikio nî mbûtû cia Amerika na Israeli, nîmo “missiles”.
Kîama gîa ithuurano cia mîtheemba îno, nîkîo gîîtagwo “Assembly of Experts”, kûratuîka atî tayarî nîkîonete atî mwana wa keerî gûciarwo wa Ayatollah Khamenei, nîwe Mojtaba Khamenei, nîwe waagîrîire kuoya gîtî kîu kîraarî gîa Ithe. No matireenda kwamba kwanîrîra itua rîu, tondû Amerika na Israeli mekwanjia kûmûhîta ooragwo mbaara-inî îno îraathiî na mbere.
O na kûrî mwaka wa 2019, thirikaari ya Amerika nîyoongereire rîîtwa rîake harî marîtwa ma andû arîa maangîîkîrîrwo mîkaana, ta kûgirio kûingîra Amerika, kûgirio kûruta mbeeca akaûnti-inî ciao, na maûndû ta macio.
We Mojtaba ta Mûûndû Nûû?
Mojtaba Khamenei aaciarirwo mweri inyaanya mweri wa keenda, mwaka wa 1969. Akoretwo agîteithîrîria ithe wîîra nginya rîrîa ithe araakwire.
Ûndû ûngî nî atî, mîrûûgamo yaake nî mîrûrû o ta ya ithe.
Gîthoomo kîa Mojtaba Khamenei
Mojtaba aathomeire cukuru igîrî o kûu Iran, îmwe îrî mûciî wa Sardasht, na îrîa îngî mûciî wa Mahabad.
Arîîkia sekondarî, nîambanîrîirie na mathoomo ma ndini ya Gîithîramu, na ithe aarî mwarimû ûmwe waake.
Mwarimû ûcio ûngî aarî mûthuuri Mû-Iran wa kuuma Iraq, na aakîrî ûmwe wa atoongoria a ndini (Shia cleric). Eetagwo Mahmoud Hashemi Shahroudi.
Nî Atoongoria Aingî a Iran Makuîte nîûndû wa mbaara îno?
Matharaita marîa Israeli na Amerika makoretwo magîikia Iran, na mûno mûno mûciî mûnene wa Tehran, nîmooragîîte andû aingî anene thirikaari-inî ya Iran. Arîa marîîtwa maao maanîrîirwo nî:
Ali Shamkhani, ûrîa ûraarî mûtaari wa Ayatollah Khamenei
Muhammad Pakpour, ûrîa ûraarî komaanda mûnene wa jeshi ya IRG
Abdolrahim Mousavi, ûrîa ûraarî mûnene wa aruti a wîîra a jeshi ya bûrûri
Aziz Nasirzadeh, ûrîa ûraarî waziri wa ûgitîri kûu Iran.
Gwa kahiinda gaaka, thî yoothe yeetereire kuona harîa Amerika na Israeli meekûnyootokera mbaara ya Iran, nîguo andû macookerere ûtûûro wao wa kawainda. Ta rîu îno haaro to mabûrûri ma Gulf îhuutîîtie. Îhuutîîtie andû aingî mûno a kuuma mabûrûri maangî, arîa makoragwo mîena îyo magîthûûkûma.