Njaanji ûmwe wa mûciî wa New York, Amerika, ûrîa ûrathikîrîria ciira wa President wa Venezuela, Nicolas Maduro na mûtumia waake, oigîte atî nî haki yaao gûthikîrîrio na kîhooto, na kûrûgamîrîrwo nî mawakiri ta ûrîa waatho ugîîte. Njaanji ûcio eetagwo Alvin Hellerstein.
Kûrî mweri ithatû, Njanûeri, mwaka ûyû (3/1/26), gîkuundi kîa mwanya kîa jeshi ya Amerika nî kîaingîrire Venezuela, na gîkîhota kûingîra ikuru kûrîa mûtoongoria wa bûrûri aikaraga, na makînyiita President Maduro na mûtumia waake. O hau hau makîmoombûkia na ndege nginya mûciî wa New York, Amerika.
Njumatatû îyo yaarûmîrîire, mweri ithaano (5th) thirikaari îkîmatwara igooti-inî mûciî-inî wa Manhattan, New York. Magîkîîrwo gîtûmi gîa kûhiingûrîrwo thitaango: gûkorwo makuruhanîîte na matharaita, ndaawa cia kûreebia, na maûndû ma gûthûûkia ûgitîri ma mûhîrîga wa “narco-terrorism”.
Wakiri ûrîa ûrûgamîrîire mûtumia wa Maduro nîahooire igooti rîmûrekererie aciire arî nja, toondû nîarî mûrimû wa ngoro. No ndaambire gwîtîkîrio.
Thirikaari ya Amerika Kûgiria Venezuela îrûgamîrîre haathara ya Mawakiri
Thirikaari ya Amerika nîyaambîîte gwîtîkîria Maduro na mûtumia waake marîhîrwo nî bûrûri waao haathara ya mawaakiri, no kûrî mûthenya wa Kana ga kiumia kîrîa kîraathirire, Maduro mareehwo igooti-inî nîguo ciira waanjie, mawakiri arîa maraamatetera nîmeerire igooti atî thirikaari nî îrakaanjire marûa ma gwîtîkîria marîhîrwo.
Wakiri ûrîa ûtongoreetie mwena wa Maduro, nîwe Barry Pollack, eerire igoti atî, kûgiria Maduro arîhîrwo haathara ya igooti, na we na mûtumia waake mamenyithîtie igooti atî matiingîhota kwîrûgamîrîra, nî kûmahinyîrîria, na kûmaima haki yaao.
Magîciirîra ûhoro ûyû wa marîhi ma mawakiri (legal fees), Pollack nîaroigîte atî, angîkorwo Amerika ndîîkûreka Venezuela îrûûgamîrîre marîhi macio, mawakiri nî mekwîyeeheria, toondû matiikîruta wîîra wa tûhû. Na toondû nî haki ya mûûndû woothe kûrûgamîrîrwo nî wakiri kûriingana na waatho, ciira ndwagîrîirwo nî gûthiî na mbere Maduro matarî na mawaakiri.
Agakîhooya igooti rîteanîrie ciira ûyû. Na o ro hau nîaikirie kamûguî kûrî athitaangani, akiuga atîrî: Kûbatiî marîhi ma mawaakiri moime kîgîîna-inî gîtheru, na andû aya mûmathitaangîire maûndû maingîragia mbeeca ciî gîko.
Njaanji Hellerstein Kûgweta atî no Ateanîrie Ciira
O na gûtuîka thuutha-inî Njaanji Hellerstein nîerire igooti atî ndeegûteanîria ciira, nîambîîte kwîra mweena wa thitaango meehîke, meeherie thîîna ûyû wî ho wa mîrîhîre ya mawaakiri, kana agîikie ciira nja.
Waabici îrîa yaheanîîte marûa (license) Maduro marûgamîrîrwo nî Venezuela îracooka îraamakaanja, îîtagwo “Office of Foreign Assets Control” (OFAC).
Judge Hellerstein ndaanatua mûthenya ûrîa ciira ûcio ûgûtwarithio na mbere.