Wabici Nene ya Amerika bûrûri-inî wa Cuba (Embassy) nî ta îninûkîîtie maguta maayo, na kûrî na thîîna wa maguta Cuba. Na mûndû arî Cuba no abatario nî kûhûthîra njenerîîta ndagîka o yoothe, nîûndû wa thiitima kûûra mûno.
No thirikaari ya Cuba ndîraaga toro nî thîîna ûcio wa Embassy ya Amerika, tondû ûkoreetwo ho nîûndû wa mûtoongoria wa Amerika, Donald Trump.
Mwaka-inî wa 2015, President Barack Obama nîehereirie gîcigîrîra gîîkî gîa Cuba mîhîînga ya kîîbiacara îrîa yaakoreetwo ho kuuma mwaka-inî wa 1982, ya kuuga Cuba ndîgaathogorane na Amerika. Maûndû magîkîanjia kwagîra Cuba.
Ona gûtuîka nî kûrî mabûrûri maingî matarî ûûru na Cuba, matirî hakuhî na Cuba ta ûrîa Amerika îrî. Kwoguo indo ingiuma kûraaya ikeendio Cuba, igîkinya Cuba itiingîgûrîka nî goro.
Nîgetha mîhîînga îno îgeekîrwo nî Amerika, gwatuîkîîte atî Cuba nî înyiitaga mbaru itoi iria ciûîkaine ta “terrorists”, iria ihûûraga mboomu mîkaawa mînene na kûûndû kûûngî ta kûu.
Rîrîa Trump ooire ûtoongoria wa Amerika, aacokirie Cuba o harîa yaarî mbere. Ûguo nî ta kuuga atî, kuuma Njanûeri mwaka-inî wa 2021 Trump atanarîîkia waathani wa mbere, gûtirî mûhûûri wa biacara wa Amerika ûngîendeirie Cuba kîîndû, kana kûgûra kîîndû kuuma Cuba.
No naake President Joe Biden, tondû nîahootire Trump ûnene gîthuurano kîrîa kîarûmîrîire, ataanoima gîturwa-inî gîa President nîarutire Cuba harîa yacooketio nî Trump. Agîkîmîcookia harîa Obama amîtigîîte.
No waakîhaanire ta mûthaako wa mbîa na nyau tondû, Trump rîrîa araciindire ûnene thuutha wa Biden kuuma, nî ta eehîtîire Cuba. Akîrîkia ûguo kwîhîtithio kiambîrîria-inî kîa mwaka wa 2025, no gûtuunya atuunyire Cuba wîyaathi wa kîîbiacara ûrîa yatigîirwo nî Biden. Kwoguo o na ûmûthî ûyû, Amerika na Cuba o na marigainie, matingîthogorana.
Venezuela na Russia nîcio Kîguni gîa Cuba
Tiga nî Russia na Venezuela kûnyiitîrîra Cuba, gîcigîrîra kîu kîngîtûire na thîna mûnene mûno. No Russia îkîrî o haraihu, kwoguo tiga nî maguta, no îremwo gûteithia Cuba na indo ingî nyiingî cia mahûthîro. Tondû Cuba îtûrîîte îregeete mûikarîre wa Amerika wa “capitalism”, nî îtûirie ndûgû na Russia, tondû ona Russia îtûire îmeneete “capitalism”.
Kuuma o hîîndî ya mûnene wa mbere, Fidel Castro, Cuba îtûire îrûmagîrîra “communism”. Russia nayo îratûûrîte îrî “socialist”, na mîikarîre îyo yeerî nî îkuhanîrîirie. Ningî Russia o nayo yaneekîrîrwo mîkaana ya kîîbicara nî Amerika, kwoguo nîyûûî thîîna ûcio ûrîa ûtariî.
Thîîna ûraingîhîire Cuba kîambîrîria kîa mwaka ûyû wa 2026, rîrîa Donald Trump aranyiitithirie mûtoongoria wa Venezuela, Nicolas Maduro na mûtumia waake, na aramahiingîrithia njeera Amerika. Aracooka aramakia mûnene mwerû wa Venezuela, Delcy Rodriguez, akîmwîraga aaga kûrûmîrîra waatho wa Amerika egwîkora harûrû.
Rîu Cuba kwona maguta kuuma Venezuela nî thîîna, na tene maraingîragia mataangi ngiri mîroongo îtatû na mataano (35,000 barrels) o mûthenya.
No nayo thirikaari ya Cuba îraamenyire o nao maabithaa a Embassy ya Amerika mekûigua ûrîa andû a Cuba maraigua. Embassy ya Spain îîrutîire kûmagaîra maguta maao, thirikaari îroiga, “Gûtirî ûndû ta ûcio. Mûndû aniina maguta maake aikare ûguo ta ithuî”.
No mûnyaka wa Cuba nî atî Vladimir Putin thikû ici ndaramakio mûno nî Amerika. Tayarî thirikaari yaake nî îtûmîîte meeri igîrî itwarîre Cuba maguta, na ciî njîra. Rîu andû meeroreire moone nî ûrîkû Trump ekwamba kûhinyia: wa gûthigaana nûû ûreenderia û maguta, kana wa kûrîîkia mbaara îrîa maanjirie Iran me na Benjamin Netanyahu wa Israeli.