President wa bûrûri wa North Korea, Kim Jong Un, rîu araatheka akoonwo rîa gîturi. Gîtûmi nî atî, rîrîa aanokîrîrwo nî President wa Amerika, Donald Trump, ti ta kûrî mûûndû wonaga ahîtîirio.
No kahiinda-inî gaaka, andû nîmaanjîtie gûthaangania ûhoro wa mwîciirîrie na mwîkîre wa maûndû wa Trump.
Mwaka-inî wa mbere wa Donald Trump gûkorwo arî President, 2017, nîathukirie Kim Jong Un arî na mwîhoko wa kûmûgarûra meciiria, nîguo eetîkîre kûruta matharaita ma niukiria (nuclear weapons) ma bûrûri waake mathûkaangio.
Gûgîkinya haandû Trump akîanjia kwandîka maûndû mûtandao-inî, atî maûndû meetîkanîirie na mûtoongoria ûcio wa Korea ya rûgoongo. President ûcio aamenya gûtirî ûndû wa macio meetîkanîirie agakaana kîng’aang’a-inî. O na hîîndî îmwe eerire andû a gwake matigaathikîrîrie ndeto cia mûthuuri ûcio “mûkûrû ûtamenyaga mbere kana thuutha”. Hîndî îyo aroiga ûhoro wa Trump.
Rîrîa Trump aamenyithirio ûrîa Un ooigîîte, eerire amemeerekia atî Un nî “mûgûrûki”. Ningî akîûria, “Atî anjîta mûûndû mûkûrû? Niî ndiikwenda kuuga ûhoro waake î, atî ta rîu ndîmwîte kamûûndû gakuhî kanoru”.
Amemeerekia maigua mîario ya anene aya eerî, magakîgega. No maacoka maarora, makoona atî Trump nî wa mîaka 70 hîndî îyo, na Un ona ndaakinyîîtie 35. Magakîrigwo nûû ûngîthoomithia ûrîa ûngî mwîkuuîre mwega wa President.
Kim Jong Un Oigîte Nî Oohîgire nî Kûûma na Matharaita ma Bûrûri Waake
Kim Jong Un areeroreire Trump agîkoria Iran mbaara atî toondû nîoneete Iran ta îreenda gûthoondeka matharaita ma niukiria. Akarigwo atîrî: Ithuî na twî namo rî, nîkîî ataratûrehere haaro?
Agacooka akaririkana atî nî kûrî mabûrûri maangî me na matharaita macio hataari.
Aambîrîria eerî a mbaara îno ya Iran, Amerika na Israel, nîmarî na matharaita ma niukiria (nuclear weapons). Russia îrî namo. Baraanja îrî namo. China îrî namo. Pakistani, UK, India, na Korea ya Rûgoongo, oothe me namo. Iran îrooneirwo nîkî?
Kim Jong Un agagîîcokeria kîûria: Ruunagîra harîa hahûthû. Gûkorwo na matharaita ma niukiria nî gûtûmaga Amerika îgûûke weega, ndûkae kûmaruta thitoo ûmahûthîre kwîgita. Trump ndaangîkûingîrîra o ûguo ta ûrîa araingîrîire Iran.
Nao andû maathikîrîria mwonere ûyû wa maûndû wa Kim Jong Un, na maaririkana atî Amerika yaanatharîkîra bûrûri wa Iraq maûigîrîire atî nîûrî matharaita ma ndawa njûru (chemical weapons), makoona kweri Amerika nî îrî waara waayo. Makoona atî nî ûhûthû Amerika îkoragwo îgîcaria njîra cia gûkinyîra maguta ma mabûrûri macio.
North Korea na Russia Nî Mamatîîtie Ndûgû
Hîndî îno Trump arabaanga ûrîa egûthooria mabûrûri maangî, nayo Korea ya Rûgoongo no kûbaangana îkoreetwo îkîbaangana na Russia ûrîa meegûteithania. Russia îgakîhe Korea îno maguta na irio, tondû nayo nî njîkîrîre mîkaana ya kîîbiacara. Nayo Korea îkahe Russia matharaita marîa îtarî namo, ta mîtheemba îmwe ya “drone”. Ningî nî îheanîîte mbirarû ciayo igateithie Russia kûrûa bûrûri-inî wa Ukraine.
Rîu o na rîrîa mabûrûri maangî makirîîte ûguo, nginya ma rûraaya marîa maaregire gûthiî gûteithia Trump kûhûûra Iran, maingî maroona maûndû maya ma mbaara o ta North Korea. No harîa mo moinagîra kanua ngû.