Bishop Margaret Wanjirū wa Jesus Is Alive Ministries (JIAM) nīaraneanire marūa ma gūtiga wīīra. Araarī mūikarīri gītī wa Komiconi ya Njūūī, Nairobi NRC), na nīkīo gīturwa kīrīa araarekirie.
Wanjirū araneengerire mūnene wa mawīīra ma mūingī marūa macio, na araheane nūtīthi. Nayo nūtīthi īyo nī ya thiikū mīroongo ītatū (30 days’ notice). Kwoguo Bishop Wanjirū egūkorwo wīīra-inī nginya 31st August, 2026.
Bishop Margaret Wanjirū Gūcokeria President Ngaatho
Wanjirū aroigire marūa-inī maake atī araatiga wīìra wa Komiiconi ageeke ūndū ūngī. No nīaracookeirie Raisi Ruto ngaatho nīūndū wa kūmwīhokera gūtoongoria Komiiconi īyo ya NRC.
Hiihi Wanjirū areenda kwīhaarīria kīūteti? No kaī ndoonanītie ndariiri ī. No niingī o na korwo noguo, we Wanjirū ti mūgeni na ūteti. Aanakorwo arī mūnjuumbe wa Starehe, Nairobi. O na no arī ahūūranīra iturwa cia ūngaabana na ūtheenīta akaaga kūhootana.
Bishop Wanjirū Ūteti-inī
Bishop Margaret Wanjirū aanjirie ūteti mwaka-inī wa 2007, hīndī ya taamu ya keerī ya President Mwai Kībakī. Ahūūranīire gīturwa kīu na tigiti ya ODM, na agītuīka MP wa Starehe Constituency.
Mwaka-inī wa 2008, President Kībakī nī amūthuurire atuīke mūniini wa Minithita wa Manyūūmba. Na Bishop Wanjirū agīgītuungata gītī-inī kīu nginya taamu yaake īgīthira.
Gwakinya mwaka wa 2013, Bishop Wanjirū nīageeririe kūhūūranīra gīturwa kīa ūngabana wa Nairobi. No Komiconi ya Ithuurano (IEBC) nī yaamūgiririe, atī kūrī ūndū ataahingītie.
No gwakinya mwaka wa 2017, nīahotire kūingīra kīhītahītano-inī kīa ū-ngabana. Hīndī īno niingī, ndaigana gūciinda. Gītī kīu gīathiire na Mūhecimiwa Mike Sonko, ūrīa wahūrīīte kura cia namba igīrī maita meerī. Naake Bishop Margaret Wanjirū agagītuīka namba ithatū.
No mbicobu ndaakuire ngoro. Mwaka-inī wa 2022, nīahūūranīire gītī kīa ūtheenīta na kīama kīa UDA. No o na akorwo aarī na kura nyiingī ma, 550,000, gītī kīu
kīoirwo nī Edwin Sifuna wa ODM. Sifuna aarī na kura 700,000.
Kwa mūnyaka, President Ruto ooya ūtoongoria, nīoneire Wanjirū wīīra angīruta thirikaari-inī ta Komicona.
Bishop Wanjirū Gūtuīka Commissioner
Mwaka-inī wa 2024, President Ruto nī athuurire Bishop Margaret arūgamīrīre Komiconi ya Njūūī cia Nairobi, arī mūikarīri gītī. Na mbicobu araakīruta wīīra ūcio mīeri mīroongo īīrī na īīrī.
No kūrī mūthenya wa Kana kiumia gīīkī, Bishop Margaret Wanjirū nī araandīkire marūa ma gūtiga wīīraūcio. Naguo ūhoro ūkoniī gītūmi, aroigire marūa-inī atī areenda gūthiī gwīka ūndū ūngī.
Wanjirū aneanire marūa maake kūrī mūnene wa mawīīra ma mūingī wītagwo Kosgei. Na araakīmwīra acookerie President Ruto ngaatho nīūndū wa ūguo aamwīhokeire wīīra ta Komicona.