Ngabana wa Bungoma, Kennedy Lusaka, nî arabuutire Minista aake oothe ira, arîa kaûntî-inî metagwo ameemba a CEC.
Arabuutire nginya Mûnene wa Waatho (County Attorney) na Karani Mûnene (County Secretary).
Mathîîna ma Bungoma
Gûgîgaakinya haaha nî gûkoreetwo na thîîna ûtaangîhithîka kaûntî-inî ya Bungoma. Kûrooneka ta mathabu ma kaûntî makoreetwo matekûigwo weega gwa kahiinda, na hiihi ona wîîra ûkarutwo ûtarûûngîrîirie, nginya hakuhî Ngabana mahîtanie na Senate.
Ta rîu kûrî andû matuîkaga maarutîire kaûntî wîîra, na nî maagîrîirwo gûkorwo marîhîîtwo no ti arîhe. No ûguo ti thîîna mûno ta ûrîa thiirî ûcio ûigana. Thiirî ûcio wîîtagwo “Pending Bills” ûkinyîîte ciriingi mbirioni inya na mirioni magana mataandatû (Ksh.4.6 billion).
Gûgacooka gûgatuîka atî, mbeeca iria ireengagwo aruti a wîîra ta cia marîhi ma ûkûrû-inî (NSSF), cia thibitaarî (SHA), na maangî ta macio, makoreetwo mateegûkinyio kûrîa maagîrîire. Na rîu thiirî ûcio ûkinyîtie ciriingi mirioni magana mataano ma mîroongo îna na keenda (Ksh.549 million).
Ameemba a Kaûntî ya Bungoma nî makoreetwo magîteta, na nî kûraakinyîîte haandû makoiga nîmegûikia kura ya kûruta Minista amwe itî-inî: kura ya kuonania matirî na mwîhoko nao rîîngî.
Nîho hiihi Ngabana Lusaka aroonire akorwo nîwe ûraatereba kaûntî yaake. Araakîbuuta Minista oothe getha athuure angî.
Na hakîrî o ûguo nîekûhe MCA kamweke ga gûkiindîra ûrîa mekwona e mwega, na kûrega ûrîa matekwenda. Rîu aikari a Bungoma na Kenya yoothe meeroreire ûguo, moone kana nîkûrî Minista a tene Lusaka egûcookia, kana ekûreehe Minista oothe eerû.