Kwî na mogarûrûku maingî mûno kuuma Njumamoothi rîrîa Amerika na Israeli matuthûrire mbaara Iran. Wa mbere, mabûrûri matakuruhanîîte na mbaara îyo nîmeekoreete kuo gatagatî.
Kwa mûhiano, Iran nîyanjîîtie kûgûtha mabûrûri ma gîcigo kîa Gulf na matharaita ma gûikîrio kûraaya, kana missiles. Bûrûri ta Qatar nî mûcûnithie mbaara îyo nî Iran. Bahrain ta guo. Dubai ta guo. O na bûrûri wa Arabu wa UAE. O na rîu ndege itiingîhota kûhîtûkîra rîera-inî mwena ûcio wa Gulf.
Ndege cia Mabûrûri ma Gulf ihithîtio Mabûrûri Maangî
Kaambûni nyiingî cia mabûrûri ma Gulf nî irûûgamîtie ndege ciao wîîra. Itingîkuuana tondû mwena woothe wa Gulf ndûrî na ûgitîri mûgaacîru. Nîûndû woguo, ndege icio ihithîîtio mabûrûri ta Kenya na Indonesia.
Ûguo nî ta kuuga atî, mûthii ûrîa ndege yaake îraarî îhîtûkîre Gulf, ta Kîhaaro kîa ndege kîa Dubai, Kîhaaro kîa ndege kîa Sharjah, Kîhaaro kîa ndege kîa Hamad, na ihaaro ingî ta icio, rîu no aceenjirie mûbaango wa mîthiîre yaake.
O na bûrûri wa Russia nî ûraarutire marûa ma kwîra andû aake arîa me Kenya atî maarie na waabici iria ciamabangîire thabaarî ciao, kana kambûni nyene ndege iria maraarî mathiî nacio, nîguo macookerio mbeca iria mararîhîîte irî tigiti. Marîîkia ûguo, waabici îrîa îrûgamîrîire Russia bûrûri-inî wa Kenya, nîyo Embassy ya Russia, no îmateithie hau haangî.
Iran Yoonete Mabûrûri ma Gulf Nîmo Raithi Kwîrîhîria Namo
Mîaka îno tûrî, mabûrûri ma Gulf matikoretwo na ûthû na bûrûri wa Iran, o na akorwo matiraangaranganaga. Kwoguo mûndû no arigwo gîtûmi kîa Iran kûmoogita na njîra njûru ûguo ya haaro.
O na mîario-inî îrîa îrathiaga na mbere mûciî-inî wa Geneva kûûrîa Switzerland gatagatî ka Iran na Amerika kiumia gîthiru, nî bûrûri ûmwe wa Gulf ûramanyitithanagia, tondû andû a Iran na Amerika matingîikarania meetha îmwe. Bûrûri ûcio wîtagwo Oman. Na rîu thîîna wa Iran nî ûrîkû?
Thîîna wa Iran nî atî, ndîrî na matharaita ma kûigana mangîriinga Israeli kuuma haraaya. O na matingîgîkinyîra Amerika. Nî ta kuuga Iran ndîrî na mûthiithû mwega wa “missiles” cia gûthiî haraihu.
No bûrûri ûyû wî na mûthiithû mwega wa matharaita ma gûikio marîa mathiaga o kiroomita niini. Kwoguo Iran îkoona no îîrîhîirie mbaara îno na njîra ya gûthûûkangia indo cia mbaara cia Amerika, iria Amerika îhithîtie mabûrûri-inî ma hakuhî.
Mabûrûri ma Gulf marakînyiitwo nî mûtino ûcio rîrîa mûtongoria kana President wa Iran, Masoud Pezeshkian, arakîerekeirie matharaita kûrîa indo cia Amerika ihithîtio.
Na to matharaita Iran îrathûkirie kûu Gulf. Îrathûûkirie nginya igaanda cia maguta na mîrukî ya kûruga, nîyo “gas”.
Rûraaya rwa Europe rwahota Kûingîrîra Mbaara îno
Kîambîrîria gîa kiumia gîîkî rî, Iran yaikirie matharaita mburuguto, nginya Gîcigîrîra-inî kîa Cyprus, mathaa-inî ma ûtukû. Aikari a kûu makîrigwo nî atîa, tondû o matiarî na ûhoro wa mbaara hakiri-inî ciao. Kumbe Iran yatuire îgûthûkaangia nginya matharaita ma bûrûri wa Ngeretha maigîirwo nî Cyprus! Atî tondû nî ûhûthû gûkorwo Ngeretha nî îrateithia Amerika na matharaita macio.
Naguo bûrûri wa Faranja no mûûgite nî Iran. Nîkûrî haandû hakuhî na iria mûciî-inî wa Abu Dhabi, thigari cia maaî-inî cia Faranja iheetwo ûikaro. Iran îracierekeirie matharaita macio îkoreetwo îkîhûthîra mûno (short-range missiles), no ndoogo îroonekaga igûrû. Rîu Faranja yugîîte na ûrûrû mûingî atî îkwîgitîra, na îgitîre mabûrûri maangî ma Rûraaya.
Ngeretha nayo îkoiga ndîrateithagia Amerika na matharaita maayo ma Cyprus î, no rîu nî îraheeire Amerika rûûtha rwa kûhûthîra ciikaro cia jeshi ya Ngeretha irî gîcigîrîra-inî gîîtagwo Diego Garcia. Ngeretha yagûrire gîcigîrîra kîu tene mûno, na gîtiagaga majeshi.
Kûriingana na ûguo maûndû mathiîte, nî ta kuuga Rûraaya rwa Europe nîrwamenya Iran ndîrathuutûkania mûndû wîtwarîîte mbaara-inî na ûteetwarîîte. Kwoguo mabûrûri maya me tayaarî kûriinga Iran biû, makîîgitîra na makîgitîra indo ciao.