France vs Morocco îraarî ngîîmu njega o na gûtuîka Morocco nî îrahootirwo. Morocco îraarutirwo “quarterfinals” na 2:0. Kwoguo hatiraarî ûndû wa thoni.
Wa mbere, France nî tiimu yoete gîkoombe kîa “World Cup” maita meerî. No o nayo Morocco ti kau kuona atî yaanakinya semi-finals. Yaani, nî îrî yatuîka namba inya mûbiira-inî wa thî yoothe.
Andû arîa maraarî Boston hwaaî kwîrorera ngîîmu îyo ya France vs Morocco maraarî hakuhî 64,000. Marakîîrorera mûthaako wa tiimu ici ciacemanîtie hîîndî îyo îngî Qatar. Ciathaakire hamwe “semi-finals” mwaka wa 2022, kwoguo nî ciûyaine. No ûndû wa magegania nî atî, moumîrîra maarî o ta maya ma hwaaî.
France yaciindire Morocco 2:0, îkîingîra “finals” nayo Morocco îkiuma. Rîu îraciindire Morocco 2:0, îraingîra “semis” nayo Morocco îroima.
France vs Morocco: Ûrîa Ngooru Iraingîrire
France îraingîririe ngooru cierî irûmanîrîire. Tiimu cierî iraambire iraathiî mburîki gûtarî îingîrîîtie ngooru. No ciacooka kîhaaro, K. Mbappe wa France araingîria Morocco ngooru ya mbere. Hîîndî îyo nî ndagîka ya mîroongo îtaandatû (60th minute).
Gûgîkinya ndagîka ya mîroongo îtaandatû na ithaathatû (66th minute), î ûyû O. Dembele wa France. Aragûtha Morocco ngooru îngî. Iragîtuîka igîrî. Naho kuuma hau, no gûcûûacûûa. Morocco ndîigana kûreka France îingîrie ngooru îngî.
Îrathaakire ûndû îroimire kîhaaro na gîtîîo. Yaani, îraingîririo 2:0 nî tiimu îciindiite gîkoombe kîa maciindano maya maita meerî: 1998 na 2018. 1998, France yahootire Brazil, naguo 2018 îkîhoota Croatia.
Mathaako ma mubiira ma “World Cup” mathaakagwo thuutha wa mîaka îna.
Thuutha wa France vs Morocco
Thuutha wa ngîîmu îno ya 11 p.m. hwaaî, îkûrûmîrîra îngî ûmûthî thaa inya cia ûtukû cia Kenya (10 p.m.). Belgium vs Spain nîguo mûbiira wa ûmûûthî, na ûgûthaakîrwo Los Angeles, US.
Rûûciû naguo Njuuma, nî England vs Norway kûûrîa Miami, US. Îno ngîîmu îgakorwo îrî ya thaa thita cia ûtukû cia Kenya (12 midnight).
Naguo mûbiira wa kûhiinga “quarterfinal” nî wa Kiumia. Ûgakorwo ûrî ngîîmu ya Switzerland vs Argentina, ya kwanjia 4 a.m. kûûrîa Kansas, US. Kwoguo andû East Africa magakîithia na mûbiira mûthenya wa Sunday.
Kahiinda-inî gaaka, Africa no kwîrorera îkwîrorera, toondû gûtikîrî tiimu ya Africa ndigaru maciindano-inî. No nî kûrî tiimu ingî andû megûgîkenerera, nîûndû wa itûmi itiganîîte.
Amwe maahota kwenda Argentina îthiathiie, hiihi tondû nî meendete Lionel Messi. O na kana hiihi toondû noyo tiimu îtigarîîte îtarî ya rûraaya.
O na no kûrî angî mangîenda France îinûke na gîkoombe o ro rîîngî. No kahiinda-inî gaaka, mûûndû ûkeneetie eendi a mûbiira mûno nî ngûûrûkiba wa Morocco. “Goalkeeper” Yassine Bounou, kana “Mbono”, nîarateithirie Morocco mûno kîhîtahîtano-inî gîîkî, nî kûhoonokia ngooru nyiingî.
No igûrû rîa moothe, “World Cup” nî îtûmaga andû a thî yoothe meiigue marî kîîndû kîmwe. Na ûcio nî ûndû wa gûkenerwo.