Ayatollah Ali Khamenei agaathikwo mweri ûyû ûngî wa mûgwanja. Kuuma aakua mbaara ya Iran îkîambîrîria ndarî athikwo.
Ûcio nî ûndû wa mwanya kûriingana na atî kîûndûire, Mûithîramu athikagwo thuutha wa mathaa; ona ti thikû.
Ûtoongoria wa Iran ûheete ûhoro ûkoniî mathiko ma Ayatollah Khamenei thikû ciigana ûna, kuuma mweri inya nginya keenda (4th July – 9th July).
Gîkuû kîa Ayatollah Ali Khamenei
Ayatollah Khamenei aakuire gîtharîkîro-inî kîa Amerika na Israeli, mweri 28/2/26.
Mabûrûri macio meerî maabangîîte kûûraga andû arîa anene ûtoongoria-inî wa Iran na ihenya ûrîa kwahoteka. Mûtoongoria wa Amerika, Donald Trump, oonaga atî atoongoria acio maaniinwo, thirikaari ya Iran nîyaathira.
Trump agakîona atî Amerika nî îkûhota kworoota mûndû ûrîa ûkwoya ûtoongoria. Naake maiguithanie na Amerika ûrîa egûtoongoria Iran.
Iran thuutha wa Gîkuû kîa Ayatollah Khamenei
Iran îikarîîte îrûûgamîte na hinya kuuma mûtoongoria wao wa Kîîndini aakua. Kamîtî cia ûtoongoria cia Iran ciarutire wîîra waacio, na mûtoongoria mwerû akîoneka.
Mbûtû cia Islamic Revolutionary Guard Corps (IRGC) nacio îkoreetwo irûgamîrîire bûrûri waao weega, o na akorwo nî kûrî atoongoria aao mooragirwo nî Amerika na Israeli mahiinda macio mooragaga Ayatollah Ali Khamenei.
Mojtaba Khamenei kwoya ûtoongoria
Mûtoongoria wa Kîîndini wa Iran rîu nî Ayatollah Mojtaba Khamenei. Nî mûûriû wa Ayatollah Khamenei ûrîa ûrabangîrwo mathiko ma July.
Ayatollah Khamenei ataanakua, mûûriû Mojtaba nîarutithanagia wîîra naake hakuhî mûno. Aakoragwo arî mûteithia waake, hakuhî atuîke ta mûniini waake.
Ayatollah Mojtaba atuîkaga nîagurarire mûno tharîkîro-inî îyo yooragire ithe, nîkîo atarî oimîra kuuga ûndû mûingî-inî kuuma athuurwo. Maûndû marîa makoreetwo makîîrwo atî nî oiga, makoragwo maandîkîîtwo.
No ûtûûro-inî wa kawainda, arîa mamûûî moigaga arî mûrûgamo mûûmû gîsiasa o na kûrî ithe.
Mathiko ma Ayatollah Ali Khamenei
Tayarî mbica cia Ayatollah nî ciambîrîirie kwonanio iciicio-inî nene cia terebîconi, nja kûrîa raiya ya Iran îcemanagia kwa mahiinda. Rîmwe raiya nî yuumagîra îgacemania ihaaro-inî kûûndû na kûûndû, îkoonania atî nî înyiitîîte thirikaari yaao mbaru.
No kîîmûtaratara, maûndû makoniî mathiko ma Ayatollah Khamenei makaanjia mweri inya wa mûgwanja.
Mîbaango îkoniî mathiko ma Ayatollah Khamenei îrutîîtwo nî kamîtî ya kuuma waabici nene thirikaari-inî, îgacooka îkaanîrîrwo nî kameeme ga thirikaari ya Iran.
4th na 5th July
Igongoona rîa kûririkana Khamenei rîgeekîrwo kînyûûmba-inî kîmwe kînene mûciî-inî mûnene wa Tehran, nîkîo Imam Khomeinî’s Mosalla Prayer Hall. Igongoona rîu rîbangîirwo thikû igîrî: 4th na 5th July.
6th na 7th July
Andû nî magacooka marûrûûngane mataûni-inî meerî manene mweri ithaathatû na mûgwanja, taûni îmwe îrî mûciî mûnene wa Tehran. Îyo îngî nayo nî mûciî wa Qom.
Mûingî ûkoimîra ûrûmanîrîre mîthabaara-inî barabara-inî cia mataûni macio, îrî njîra ya kûririkana Ayatollah Ali Khamenei na kûmûhe gîtîîo.
9 th July: Gûthika Ayatollah
Mûthia wa igongoona rîa mathiko ma Ayatollah nî mweri keenda. Kûbaangîîtwo atî nî hîîndî îyo mwîrî waake ûkahuurûkio kîhiinga-inî gîtheru kîa Imam Reza (Holy shrine of Imam Reza). Reza aarî Imam wa kanaana wa Aithîramu a Shi’ite.
Gûûkû Ayatollah agaathikwo nî mûciî-inî mûnene wa Mashhad (Mashhad City), mwena wa itherero rîa igûrû wa bûrûri wa Iran. No mbere ya kûhurûkia mwîrî, andû nî magakîamba mahoere o kûu mûciî-inî wa Mashhad.
Thuutha ûcio rîu, andû aya angî a nja ya Iran no gweterera megweterera, moone kana kûrî ûndû ûtoongoria wa Iran ûbangîîte gûceenjia mwathanîre-inî wa bûrûri, kana o ûndû ûngî.
O na andû maahota gûtaanya atî hiihi Ayatollah Mojtaba Khamenei nîekwambîrîria kûiguîka mûno kûrî mbere.
O ûrîa kûrîthiî, ûrîa kûrî nî atî, gûthikwo kwa Ayatollah nî gûgwîîkîra rûûri rwa mûtheemba ûtoongoria-inî wa Iran.