Thigari cia EACC iraarî wîra-inî waacio wa ûthuthuuria rîrîa iraakorire ciriingi ikîrîîte mirioni 65 mûciî kwa abithaa ûmwe mûnene gwa kaûntî .
Kamîtîî îrîa îthuthuuragia maûndû ma nguungo cia mbeeca Kenya, nîyo EACC, rîrîa îrathuthuuragia ûhoro wa mathabu ma Kaûntî ya Nairobi, nî îreekinyirie mûciî-inî kwa abithaa ûrîa mûnene mwena-inî wa mîako ya manyûûmba. Maraagîthiî nginya kûrîa aikaraga, Syokimaû, Kaûntî ya Macaakû.
Abithaa ûyû nîwe Patrick Analo Akivaga, na gîturwa gîake kîa wabici nî “Chief Officer for Urban Development and Planning”.
Maabithaa a EACC meekinyirie kûu mûthenya wa Kana kiumia gîîkî, nîguo mweri 4/6/26.
Magîîka birigiceeni ciao rî, nîguo maakorire mabeeca maingî mbuuti-inî ya ngaari îmwe ya Analo yaarî kûu Syokimaû. Mbeeca icio ciarî mîhîrîga îîrî: mbeeca cia Kenya, na cia na nja.
Ciatarwo cionekire mbeeca cia Kenya ciarî ciriingi mirioni mîroongo îtaano na îmwe, na ngiri magana matatû (Ksh. 51,300,000). Nacio cia na nja ciarî ndoora cia Amerika ngiri igana rîa mîroongo îtatû ($130,000). Ciariingithanio na ciriingi ya Kenya, ndoora ici igooka mirioni ikîrîîte ikûmi na inya (Ksh.14,605,250).
Indo ingî Patrick Analo Akivaga Aanyiitirwo Nacio
Maabithaa a EACC acio maanyiitire mbeeca mekûîire nî cia nguungo, nî maanyiitire indo ingî o hau. Na magekûîra o nacio nî cia nguungo, kwoguo nî maacikuuire magîkuua mbeca.
Indo icio nî taito cia mîgûûnda, maandîko ma weendia wa manyûûmba na ngaari (sale agreements), roogo mbuuku cia ngaari, kambiuta mûtheemba wa “laptop”, na tûindo tûûngî ta tûu. Oro hau no ho maakorire maratathi ma kuonania mîbaango ya mîako Kaûntî ya Nairobi îhîtûkîîtie na îgagîîkîra thaîri (approval plans).
Uuge Kuuma EACC
Kamîtîî ya EACC nî yaarutire ndûmîrîri thuutha wa kûnyiita indo iria maabithaa maake maakorire kwa Analo Akivaga. Îkîeretha atî, abithaa ûyû aamûkagîra mbeeca na njîra mwanya mwanya. Imwe ciacio aamûkagîra na njîra ya MPESA, na ingî aamûkagîra irî mbeeca baribari.
EACC îgakiuga atî, mûikarîre wa Analo nîwoonekeete nî wa igûrû, ûndû ûtaangîhotithio nî mbeeca iria athûûkûmaga. Gûgakîoneka no akorirwo nîamûkagîra mbeeca na njîra ingî, na mûno mûno na njîra cia nguungo.
Patrick Analo Akivaga Kûrûûgamio Wîîra
Ngavana wa Kaûtî ya Nairobi, Johnson Sakaja, nîarîkîîtie kûrûgamia Analo wîîra. Aroigire aamûrûûgamia getha ûthuthuuria ûthiî na mbere weega na ûrîîke.
Aracooka aroongerera atî, ûtoongoria wa Kaûntî yaake ndûngînyiita mbaru uungumania wîîra-inî wa mûingî. Aroiga atî abithaa o na ûrîkû anyiitwo na uungumania, akuue mûtharaba waake e wîîki.
Kamûira kau, Analo ndaagîrîirwo nî kûingîra waabici yaake, kana haandû angîhuutania na maratathi ma maandîko ma kaûntî ya Nairobi.
Johnson Sakaja nîaraheire abithaa ûngî wîîra wa kûnyiitîrîra waabici ya Analo hîîndî îno ciira ûraathiî na mbere. Abithaa ûyû nî ndaîrekita o mwena ûcio wa ûkûria wa mîako, na eetagwo Dominic Mûtegi.
Patrick Analo Kûrekio na Mbîîro
Maabithaa a EACC mona ûrîa moonire kwa Analo, Syokimaû, nî maamûtwarire igooti-inî mûthenya ûyû ûngî, nîguo wa Gataano. Na njaanji aathikîrîria ûrîa kûrî, nîarekire aciire arî nja.
Agîkîmûhe mbîîro ya mbeeca baribari ya ciriingi ngiri magana mataano. Rîu arîthiaga gwîtîka ciira na gûciira akîinûkaga, nginya igooti rîgaatua itua.
Kamûira kau, nî kûrî maûndû maraceenjio waabici-inî, ta mîtaratara îrîa îrîgeragîrwo gûgîgaakinya atî buraani ya mwako nî yekîrwo kîrore.