Kîhaaro kîa Ndege kîa Jomo Kenyatta mûciî-inî mûnene wa Kenya, Nairobi, nî kîraagûmîirwo nî kîbii kîingî mûthenya wa ira.
Kîbii kîu kîraarî kîingî ûû atî atwarithia a ndege matiingîroonire weega harîa maragûithia ndege maakinya.
Rîu Kûraathiire Atîa Kîbii Kîaingîha?
Aruti a wîîra arîa maheaga atwarithia a ndege mwerekera wa kûûmbûka kana kûgwa, nîo “air traffic controllers”, mareerekeirie ndege igîrî iraingîraga kahiinda-inî kau ga kîbii kîingî kîhaaro-inî kîîngî.
Ndege îmwe ya icio îroimaga mûciî-inî mûnene wa Malawi, nîguo Lilongwe. Îyo îngî îroimîîte mûciî-inî mûnene wa Zimbabwe, nîguo Harare. Cierî ireerekeirio kîhaaro-inî kîa ndege bûrûri-inî wa Tanzania, gîa Kilimanjaro.
O ta ûrîa ndege ingî cianeeka rîrîa rîera rîtaikaire weega Jomo Kenyatta, ndege icio cierî irahuurûkaangire na athii arîa irakuuîte kûu Kilimanjaro, iracooka iraamatwara Jomo Kenyatta rîera rîagîra.
Kîmera gîîkî nî kûraakorwo na mbura nene Nairobi, na hîîndî îmwe ya mbura nî îkoragwo na kîbii.
Ûtoongoria wa ihaaro cia ndege nîûrutithanagia wîîra. O na ta rîrîa ndege ya Canada yagîire na mûtino kîhaaro-inî kîa LaGuardia, Amerika, kûngîagîire na ndege îkwaaga ha kûgûa kûu LaGuardia, îngîerekeirio kîhaaro-inî kîîngî kîa ndege.
Bata mûnene nî gîkorwo kîhaaro kîu kîîngî nî gîa gîkîro kîagîrîire, kûriingana na ûnene kana mûtheemba wa ndege îyo îreerekerio kuo.