Iran îreera Amerika îcookerere mbaara akorwo nî îrahîîahîîa, yo Iran ndîraamaka.
Bûrûri wa Iran ugîîte ndûraamakio nî mbaara. Ûrîa ûroigîire Iran ûguo nî mwaria (speaker) wa Mbuunge Mohammad Ghalibaf.
Aroigire nî kûhûûmûka Iran îîtîkîrîîte kûhûûmûka hîîndî îno Amerika yuugîîte kûgîe na mburîki ya thaayû.
Niingî nîarendaga gûkararia ûndû mûtoongoria wa Amerika, Donald Trump, aroigire. Naguo nî atî, Amerika nî îniinîîte Iran hinya, na kwoguo ndaawa yao no gûthareenda.
O hau, Trump aroigire atî ûrîa Amerika îhingîîte gacîra ka maaî-inî ka Hormuz, kûhotomîtie biacara ya Iran biû.
Thoko Ya Thî Nî Îraatukanio Nî Mîario na Ciîko itahanaine cia Trump
Ta rîu mûthenya ûrîa Trump aroigire ûrîa ahotomîtie mîthiîre gacîra-inî ka Hormuz, thogora wa maguta ûrahaicire ûraakîria ndoora igana rîa mîroongo îîrî na ithaathatû.
Na ahûûri a biacara no maràigua ûrîa Amerika îracookithia meeri cia maguta cia mabûrûri maangî ta China.
Ona akorwo mbei îyo nî îracookire îragûûagûûa, thî yoothe îrî na waagagu.
Trump Nîararitûhia Ûhoro wa Mbaara ya Iran Gûthira
Trump rîu aroiga no mûhaka Iran yuuge ndîgathoondeka matharaita ma “nuclear” o rî o rî. O na ningî îîtîkîre gwîkîra kîrore kîrîîkanîro kîa maûndû makoniî “nuclear”.
Rîrîa Trump ooire waathani riita rîa mbere, aakorire Iran îîtîkîrîîte gwîkîra kîrore kîrîîkanîro kîa maûndû ma “nuclear”. Kîrîîkanîro kîu kîabaangîtwo ûtoongoria-inî wa President Barack Obama.
Rîu Iran îraarigwo Trump araaria ûhoro wa kîî na nîwe wakaanjire kîrîîkanîro gîaciirîirwo weega na mabûrûri magaikara na thaayû na Iran.
Harîa gûkinyîîte rîu, no andû meeroreire, tondû gûtirî mûûndû ûraamenya nîatîa Trump aangiuga na ûhiinge. O na kana nîatîa araanîrîra na nî wa ma.