Iran nî îragîire ateteri me gatû.
Kûrî mûthenya wa ira, 7/4/26, kamîtî ya ûgitîri ya Ûûrûmwe wa Mabûrûri, nîyo UNSC, nî îraacemanîtie mûciî-inî wa New York, Amerika.
Ûhoro ûrîa ûraarî metha-inî nî ûrîa Iran îîngîîrwo kîa hinya îhiingûre gacîra ka maaî-inî ka Hormuz (Strait of Hormuz), karîa îkoretwo îhiingîrîirie meeri cia Amerika na araata aake.
Ûndû ûyû ûreendaga kura, na nî iragîikirio. Ûrîa wa bata rîu nî atî, Iran îgûthiî na mbere kwîyaatha na gacîra kau ka Hormuz, nginya hîndî îtoîkaine nî îrîkû.
Ûrîa Ameemba a UNSC Maraikirie Kura
Kamîtî ya UNSC îrî ameemba ikûmi na ataano (15), na ataano harî acio marî hinya mûnene ma (veto power). O na mabûrûri ikûmi na mana mangîkorwo mwena ûmwe, na bûrûri ûmwe wa macio mataano ûregane nao, ciira ûcio nî wahootwo.
Rîu ciira wa ira ûraikîirio kura nî mabûrûri ikûmi na matatû (13), tondû meerî, nîmo Colombia na Pakistan, nîmararegire gûthuura mwena o na ûrîkû.
Aamemba acio angî hakuhî oothe maraikirie kura ya kûnyiita mbaru ûhoro ûcio ûraarî metha-inî. Ûhoro ûcio ûkoreetwo ûgîtabanio nî bûrûri wa Arabu wa Bahrain, ûrîa arî gîcigîrîra kîrî iria-inî rîa Paacia (Persian Gulf). No me rûmwe na mabûrûri marîa maangî ma Gulf: Jordan, Kuwait, Qatar, Saudi Arabia na UAE
Kûreendagwo Ciira Waahîtûka Gûthiî Atîa?
Kûreendagwo ciira waahîtûka, mabûrûri moothe ma UN, igana rîa mîroongo keenda na matatû (193), makorwo nî maaheo rûûtha rwa kûnyiitana, marute mbirarû ciao, meeri ciao, na matharaita ma mbaara, mathiî makaraangîre gacîra ka Hormuz na îîria îyo yoothe.
Bata mûnene ûraarî atî, o na akorwo Iran nî kûhûûrwo îkîhûûrwo mwena ûcio, meeri, mûno mûno cia biacara, iheeo ûgitîri ihote kûhîtûkia maguta kuuma gîcigo-inî kîa Gulf.
Russia na China Kûregana na Itua rîa Kûnyiita Iran Ngiingo
Mabûrûri ma Russia na China nî mamwe ma marîa mataano marî hinya mûritû gûkîra macio maangî. Harî ûhoro ûyû wa Iran na gacîra ka Hormuz, maroigire aaca.
Kwoguo, o na kura cia gwîtîkîra irî ikûmi na îmwe (11) na kûbataranagia o kenda (9) tu, itua rîrîa Bahrain na mabûrûri maangî mareendaga, nîrîraaremire.
Ûguo nî ta kuuga atî, Iran îîgûthiî na mbere gûtawaara ûrîa gacîra ka maaî-inî ka Hormuz karîhûthagîrwo, nginya hîîndî îrîa îtaangîmenyeka ndagîka îno.
Russia na China Marareganire na Weendi wa Mabûrûri marîa Maingî harî UNSC Nîkî?
President wa China, Xi Jinping, na wa Russia, Vladimir Putin, maciira na thirikaari ciao maroonire atî, Iran nîyo îkûhinyîrîrio gwathiî ûrîa Amerika na mabûrûri macio maangî meetîkanîirie.
Maroiga atî ciira ûrîa ûraciirwo nî wa ûrîa mabûrûri ma thî mathûkîirwo nî ucuumi nîûndû wa Iran kûgiria meeri ihîtûkîre Hormuz na ûhuru. No ciira ûcio ndûragweeta kîrîa gîacûûngîrîirie Iran gûkaahinga gacîra kau.
Russia na China magakiuga atî, gwîtîkîria ciira ta ûcio, kana “resolution” ta îyo îhîtûkio, nî gwîtîkîra Iran îhinyîrîrio hatarî na kîhooto.
Mabûrûri maya meerî nî marongereire atî, ciira ûngîtuuo ûrîa kûreendekana, haagûkorwo harî kîonereria kîûru harî ûrîa maûndû marîroragwo matukû-inî megûûka. Mabûrûri makîgîe na ûrûme atî, bûrûri no ûhithûkîre ûngî na ndûûrio nî mûûndû, no ûrîa mûhithûkîre atuîke nî egûthimîrwo njîra cia kwîgita na kwîriingîra.
Mûthia-inî Amerika ndîînagîkenio nî mûrûgamo wa Russia na China, na îrakîhaana ta arî yo nduure kûrî mabûrûri marîa maangî moothe. O na abithaa mûnene ûrîa ûrûgamîrîire Amerika harî UN, nîarararutire mûgambo wa kuuga ûrîa Russia na China meeka ûûru.
No no mûhaka akorwo Iran nî îraakenire mûno ira, nî kuona nî kûrî mabûrûri marûgamîîte na itua rîa atî: Ciira wa mwega ûtuuo ta wa mûûru.